'हलाल', 'नवरा माझा भोवरा', 'वाजवूया बँड बाजा', 'अहिल्या', 'विजेता' या चित्रपटातून अभिनेत्री प्रीतम कागणे प्रेक्षकांसमोर आली. तर अभिनेता बिपिन सुर्वे 'प्रतिभा' या चित्रपटातून आणि 'चंद्र आहे साक्षीला' या मालिकेतून प्रेक्षकांच्या भेटीस आला. आता नव्याने प्रीतम आणि बिपिन 'तुझं माझं अरेंज मॅरेज' या चित्रपटातून प्रेक्षकांच्या मनावर अधिराज्य गाजवायला सज्ज झाले आहेत. चित्रपटाच्या निमित्ताने ही जोडी मोठया पडद्यावर दिसणार आहे. प्रीतम आणि बिपिनची जोडी एका वेगळ्या धाटणीच्या गंभीर विषयाच्या गमतीदार कथेतून सिनेप्रेमींसमोर येणार आहे.

'तुझं माझं अरेंज मॅरेज' चित्रपटात प्रीतम आणि बिपिन हे पती-पत्नीच्या भूमिकेत दिसणार आहेत. प्रीतम या चित्रपटात मीरा नावाच्या मुलीची  तर बिपिन स्वरूप नावाच्या मुलाची भूमिका साकारत आहे. 'षष्ठीज फिल्म्स अँड एंटरटेन्मेंट'चे निर्माते अमित तिळवणकर आणि निर्माती ज्योती अमित तिळवणकर यांनी या चित्रपटाच्या निर्मितीची धुरा सांभाळली आहे. दिनेश विजय शिरोडे दिग्दर्शित हा सिनेमा आहे. विशेष म्हणजे या चित्रपटाच्या माध्यमातून दिनेश शिरोडे पहिल्यांदाच दिग्दर्शन क्षेत्रात पदार्पण करणार आहेत. 

हेही वाचा : 'नेटफ्लिक्स'वरील 'बॉम्बे बेगम्स' वादाच्या भोवऱ्यात; २४ तासांत उत्तर देण्याचे आदेश

अभिनेत्री प्रीतम कागणे आणि अभिनेता बिपिन सुर्वेसह या चित्रपटात अभिनेता अमोल कागणे, सयाजी शिंदे, अभिजित चव्हाण तर अभिनेत्री मीरा सारंग, अभिलेशा पाटील, भाग्यश्री नलवे आदी कलाकारांच्या दमदार भूमिका पाहायला मिळणार आहेत. अतिशय धमाल आणि मनोरंजक पद्धतीने अरेंज मॅरेज हा विषय या चित्रपटात हाताळण्यात आला आहे. धमाल, मस्ती करण्यासाठी हा चित्रपट सिनेरसिकांच्या भेटीस केव्हा येतो हे पाहणे औत्स्युक्याचे ठरेल.