तिसाव्‍या आठवड्यात
गर्भपातास परवानगी

न्यायालयाचा ११ वर्षीय पीडितेला दिलासा

सकाळ वृत्तसेवा
मुंबई, ता. ३१ : लैंगिक अत्याचारातून ही मुलगी गर्भवती राहिलेल्या अकरा वर्षांच्या बलात्कारपीडित मुलीला मुंबई उच्च न्यायालयाने दिलासा दिला आहे. या मुलीला ३०व्‍या आठवड्यात गर्भपात करण्याची परवानगी मुंबई उच्च न्यायालयाने दिली आहे.
एमटीपी कायद्यानुसार २० आठवड्यांनंतर गर्भपात करता येत नाही. त्यासाठी उच्च न्यायालयाची परवानगी घ्यावी लागते. त्यानुसार पीडितेच्या वतीने उच्च न्यायालयात अर्ज करण्यात आला होता. या याचिकेवर आज (ता. ३१) सुटीकालीन न्यायालयाच्या न्या. शर्मिला देशमुख आणि न्या. जितेंद्र जैन यांच्या खंडपीठासमोर सुनावणी घेण्यात आली. त्यावेळी न्यायालयाने पीडितेला दिलासा देत तिला गर्भपात करण्याची परवानगी दिली.
-----
...तर सरकारने जबाबदारी घ्यावी!
जर अर्भक जिवंत असेल तर त्याचा जीव वाचवण्यासाठी सर्व वैद्यकीय सुविधा उपलब्ध करून द्याव्यात, तसेच अर्भक जिवंत जन्माला आले आणि याचिकाकर्ता किंवा तिचे पालक त्या बाळाची जबाबदारी घेण्यास इच्छुक नसतील किंवा ते त्या स्थितीत नसेल, तर राज्य सरकारने त्या मुलाची जबाबदारी स्वीकारावी.