अवयव प्रत्यारोपणासाठी मुंबईत ग्रीन कॉरिडॉर
२२ किमी अंतर १९ मिनिटांत कापले

सकाळ वृत्तसेवा
मुंबई, ता. ३१ : हृदय आणि यकृत विमानतळावरून दक्षिण मुंबईतील हॉस्पिटलमध्ये वेळेत पोहोचविण्यासाठी बुधवारी (ता. ३०) मुंबई वाहतूक पोलिसांनी २२ किमी लांबीचा ग्रीन कॉरिडॉर तयार केला होता. त्यामुळे हे अवयव अवघ्या १९ मिनिटांत पोहोचवता आले.
पुण्याहून संध्याकाळी सातच्या सुमारास पोहोचलेले अवयव सामान्यत: जास्त रहदारीची वेळ असल्याने कलिना विमानतळाच्या गेट क्रमांक आठवरून हंस भुग्रा रोडमार्गे वेस्टर्न एक्स्प्रेस हायवेपर्यंत दोन मिनिटांत पोहोचवण्यात आले, असे वाकोला वाहतूक विभागाचे वरिष्ठ निरीक्षक संदीप येले यांनी सांगितले. मुंबई वाहतूक पोलिसांनी एक्स अकाउंटवर पोस्ट केले आहे की, कलिना विमानतळ गेट नंबर आठपासून अवयव वाहतूक करण्यासाठी २२ किमीचा ग्रीन कॉरिडॉर तयार केला. गिरगावातील एचएन रिलायन्स हॉस्पिटलपर्यंत ते अवयव आमच्या ऑन ड्युटी अधिकाऱ्यांनी काळजीपूर्वक पोहोचवले.