‘रिव्‍हाईव्‍ह सीआरपी’चे आज उद्‌घाटन

हृदयविकाराची माहिती देणारे पहिले भारतीय बनावटीचे ॲप

सकाळ वृत्तसेवा
मुंबई, ता. १३ : हृदयविकार आणि त्याच्याशी संबंधित विविध आजारांमुळे जगभरातील अनेक लोकांना जीव गमवावा लागतो. त्यामुळे या आजाराची लक्षणे आणि त्यासंबंधीची माहिती कोट्यवधी लोकांना सहज उपलब्ध व्हावी, यासाठी पहिल्या भारतीय बनावटीच्या ‘रिव्हाईव्ह सीआरपी ॲप’चे आज वांद्रे पूर्वेतील जिओ वर्ल्ड कन्व्‍हेन्शन सेंटरमध्ये उद्‌घाटन करण्यात येणार आहे.

रिव्हाईव्ह हार्ट फाउंडेशनचे संस्थापक टीम सदस्य डॉ. यश लोखंडवाला, डॉ. ब्रायन पिंटो, डॉ. आदित्य कपूर, डॉ. मंजू सिन्हा आणि डॉ. किंजल गोयल यांच्या नेतृत्वाखाली भारतातील आघाडीच्या हृदयरोगतज्ज्ञांसोबत भागीदारीत रिव्‍हाईव्ह सीपीआर ॲप विकसित करण्यात आले आहे. या चळवळीला ‘इप्का लॅबोरेटरी’ने पाठिंबा दिला आहे. प्रसिद्ध अभिनेत्री काजोल ही रिव्हाईव्ह सीपीआर मूव्हमेंट २०२४साठी ब्रँड ॲम्बेसेडर आहे. या हृदयविकारासंबंधी वेगवेगळ्या प्रकारची माहिती देणाऱ्या चळवळीला विविध क्षेत्रांतील नामवंत व्यक्तींनी पाठिंबा दिला आहे. यामध्ये अभिनेते अजय देवगण, अभिनेत्री शिल्पा शेट्टी, अभिनेते विवेक ओबेरॉय यांच्यासह क्रिकेटपटू इरफान पठाण आदींचा समावेश आहे. रिव्‍हाईव्‍ह सीपीआर ॲपद्वारे हृदयरोगतज्ज्ञांकडून वेळेवर सीपीआर मिळाल्यास जीव कसा वाचू शकतो, याबद्दल माहिती देण्यात आली आहे. तसेच, हृदयविकाराचा झटका आणि कार्डियाक ॲरेस्ट यांच्यातील फरक स्पष्‍ट करताना ते कसे ओळखावेत, याबाबत ऑडिओ आणि व्हिज्युअल्सद्वारे माहिती देण्यात आली आहे. ज्यामुळे कार्डियाक ॲरेस्टच्या परिस्थितीत तातडीने वैद्यकीय मदत मिळवून देता येते.