सकाळ वृत्तसेवा
मुंबई, ता. २० : जे. जे. रुग्णालयातील अंतिम वर्षाच्या निवासी डॉक्टरने १६ जुलै रोजी झोपेच्या गोळ्या घेत आत्महत्येचा प्रयत्न केला होता. वरिष्ठांच्या दुर्लक्षामुळे हा प्रकार झाल्याचा आरोप करीत बालरोग विभागातील डॉक्टरांनी काम बंद आंदोलन केले होते.
एका तृतीय वर्षीय महिला डॉक्टरने विभागप्रमुखाला एक भावनिक संदेश केला. दरम्यान, संदेश पाहूनही विभागप्रमुखाने त्याला उत्तर दिले नाही. त्या मुलीला समुपदेशन करून आत्महत्येच्या प्रयत्नापासून दूर ठेवता आले असते. त्यामुळे अशा विद्यार्थ्यांकडे दुर्लक्ष करणाऱ्या, त्यांचा मानसिक ताण वाढवणाऱ्या विभागप्रमुखावर कारवाई करा, या मागणीसाठी विद्यार्थ्यांनी आंदोलन केले होते. आत्महत्येचा प्रयत्न करण्यापूर्वी लिहिलेल्या पत्रात बालरोग विभागाच्या प्रमुखाचे नाव लिहिले आहे. मात्र तृतीय वर्षातील महिला डॉक्टर मानसिक आरोग्याशी संबंधित समस्यांसाठी औषधे घेत होती, असे रुग्णालयातील एका वरिष्ठ डॉक्टराने स्पष्ट केले आहे.
विभागप्रमुखाविरोधात विभागातील ४२ विद्यार्थ्यांनी स्वाक्षरी करीत विविध तक्रारी समितीसमोर मांडल्या आहेत. त्यामुळे तातडीने दोन समित्या गठित करण्यात आल्या असून, सात दिवसांत प्राथमिक अहवाल सादर केला जाणार आहे.
-----------------------------------------
मार्ड संघटनेचा पाठिंबा
जे. जे. विभागातील बालरोग विभागात शिकणाऱ्या डॉक्टरांनी आंदोलन सुरू केले. यात मार्ड संघटनेनेदेखील त्यांना पाठिंबा दिला. आंदोलनावेळी विभागप्रमुख देत असलेल्या धमक्यांचा त्यांनी पाढा वाचला. मात्र वरिष्ठांकडे तक्रार करण्यामागे विभागप्रमुख नापास करतील आणि शिक्षणावर त्याचा परिणाम होईल, अशी भीती विद्यार्थ्यांना असल्याचे सांगण्यात आले. त्यामुळे विभागप्रमुख डॉक्टर वर्मा यांची बदली करा, अशी मागणी डॉक्टर करीत आहेत. दरम्यान, डॉ. बेला वर्मा यांनी आरोप फेटाळले आहेत.