नियमबाह्य फटाके ताब्यात घ्या!

सकाळ वृत्तसेवा
मुंबई, ता. १६ : महाराष्ट्र प्रदूषण नियंत्रण मंडळ (एमपीसीबी) आणि आवाज फाउंडेशन यांच्या संयुक्त विद्यमाने फटाक्यांचा आवाज आणि वायुप्रदूषण निकष तपासणी गुरुवारी (ता. १६) करण्यात आली. चेंबूर येथे ही तपासणी केल्यावर काही फटाके नियमांनुसार डेसिबल पातळी किंवा क्यूआर कोड न देता विक्रीस आल्याचे आढळले असून, असे फटाके ताब्यात घ्यावेत, असे आवाहन आवाज फाउंडेशनने केले आहे.
एमपीसीबी आणि आवाज फाउंडेशन यांनी काही फटाक्यांची एकत्रित चाचणी केली. यामध्ये एमपीसीबीने फटाक्यांच्या डेसिबल पातळीबाबत अद्याप व्यक्तिगत निकाल जाहीर केलेले नसले तरी सर्व फटाके नियमानुसार असल्याचे सांगितले, मात्र खरेदी केलेल्या फटाक्यांच्या यादीत अनेकांवर आवाज मर्यादा किंवा क्यूआर कोड दिसत नसल्याचे उघड झाले असून, अशा फटाक्यांचा वापर किंवा विक्री करण्यास मनाई आहे. पोलिसांनी ताब्यात घेऊन विक्रीवर बंदी घालणे आवश्यक असल्याचे आवाज फाउंडेशनने म्हटले आहे. फटाक्यांची विक्री आणि वापर करताना आवाज मर्यादा व इतर नियम काटेकोरपणे पाळण्याचे आवाहन आवाज फाउंडेशनच्या सुमेरा अब्दुलअली यांनी केले आहे.