कारच्या बाेनेटवरून पडून
महिला गंभीर जखमी

कारचालक आराेपीला अटक

मुंबई, ता. २५ ः पार्टी करून कारने घरी परतणाऱ्या मित्र-मैत्रिणींत फाेन घेण्यावरून वाद झाला. त्यानंतर आराेपीने तिचाही फाेन हिसकावल्याने ती रागाने कारच्या बाेनेटवर बसली. या स्थितीत आराेपीने कार वेगाने चालवून तिला खाली पाडल्याची घटना उघडकीस आली आहे. यात महिला गंभीर जखमी झाली असून आराेपी कारचालक विनीत दहिया (वय ३२) याला बाेरिवली पाेलिसांनी अटक केली आहे. दरम्यान, दाेघेही दारूच्या नशेत हाेते, अशी माहिती पाेलिसांनी दिली.

पोलिसांनी दिलेल्या माहितीनुसार, २८ वर्षीय जखमी महिला स्पामध्ये नोकरी करते. बुधवारी रात्री ती मित्र-मैत्रिणींसोबत एका हॉटेलमध्ये पार्टीसाठी गेली होती. तेथे तिची ओळख विनीतसोबत झाली. पहाटेपर्यंत पार्टी केल्यानंतर विनीतने आपल्या मित्रांसोबत या महिलेसही घरी सोडण्याबाबत विचारणा केली. मित्रांना घरी सोडल्यानंतर ताे महिलेच्या घराच्या दिशेने निघाला. गारेगावजवळ गोराई परिसरात असताना या महिलेस फोन आला. त्याच वेळी विनीतने तिचा फोन हिसकावला. त्यावरून दोघांत वाद झाला. विनीतने तिला मारहाण करून अपशब्द वापरले. त्याने फोन देण्यास नकार दिल्याने रागाच्या भरात महिला त्याच्या कारच्या बोनेटवर बसली.
तिला खाली उतरण्यास सांगूनही ती न उतरल्याने विनीतने गाडी सुरू करून वेगाने पुढे नेली. त्यात ही महिला खाली पडून गंभीर जखमी झाली. पादचाऱ्यांनी तिला पोलिसांच्या मदतीने रुग्णालयात दाखल केले. या घटनेची तक्रार दाखल हाेताच बोरिवली पोलिसांनी सीसीटीव्हीच्या मदतीने कारचे तपशील मिळवून विनीतला अटक केली.