कांदिवलीत आजपासून भजन स्पर्धा

मुंबई, ता. १४ : श्री संत ज्ञानेश्वर महाराजांच्या संजीवन समाधी सोहळ्याच्या निमित्ताने कांदिवली पूर्व येथे शनिवारीपासून (ता. १५) पुढील तीन दिवस कीर्तने, भजन स्पर्धा, भक्तिगीते, संतदर्शन सोहळा आदी धार्मिक कार्यक्रम आयोजित करण्यात आले आहेत.

लोखंडवाला संकुलातील सावित्रीबाई फुले मैदानात शनिवार ते सोमवार असे तीन दिवस हे कार्यक्रम होतील. शनिवारी कांदिवली पूर्व परिसरात मोठी दिंडीदेखील निघेल. यानिमित्ताने मुंबईतील भजनी मंडळांची भजन स्पर्धा आयोजित करण्यात आली आहे. यात सुमारे स्त्री व पुरुषांची सुमारे ५० भजनी मंडळे सहभागी होऊन भजने सादर करतील. विजेत्या मंडळांना आकर्षक पारितोषिकांसोबतच सहभागाबद्दल विशेष पारितोषिकही मिळेल, अशी माहिती आमदार अतुल भातखळकर यांनी शुक्रवारी (ता. १४) दिली. या निमित्ताने संतपरंपरेचा महिमा, त्यांची भक्ती-सेवा आणि सद्भावना यांचे दर्शन घेण्याची संधी भाविकांना मिळेल, असेही ते म्हणाले. या वेळी राज्यातील संत परंपरेचे आणि मंदिरांचे दर्शन घडवणाऱ्या आकर्षक रांगोळ्यादेखील काढण्यात आल्या आहेत. शेवटच्या दिवशी ह.भ.प. तुकाराम महाराज गावडे यांचे कीर्तन तसेच मुग्धा वैशंपायन, प्रथमेश लघाटे आदींचे भक्तिगीत गायन होईल. शनिवार आणि रविवारी भजन स्पर्धा होतील. सोमवारी दिंडी, प्रवचन, कीर्तन आणि भक्तिगीते सादर केली जातील. या निमित्ताने कांदिवलीतील वातावरण भक्तीरसाने चिंब होणार असून, भाविकांनी यात सहभागी व्हावे, असे आवाहन करण्यात आले आहे.