खर्डी, ता. २५ (बातमीदार) : मुख्यमंत्री एकनाथ शिंदे यांच्या पाठीशी राहून तालुक्यात अनेक विकासकामे करायची आहेत. त्यासाठी आगामी शहापूर विधानसभेच्या निवडणुकीत नव्या चेहऱ्याला संधी दिली जाईल. तसेच या निवडणुकीत पक्ष सोडून गेलेल्यांना त्यांची जागा दाखवून द्यावी, असे जाहीर आवाहन शिवसेनेच्या शिंदे गटाचे ठाणे जिल्हाप्रमुख (ग्रामीण) मारुती धिर्डे यांनी केले.

शहापूरचे माजी आमदार पांडुरंग बरोरा यांनी नुकतेच शिवसेनेच्या शिंदे गटाला सोडचिठ्ठी देण्याचे जाहीर केल्याने शिंदे गटाच्या पदाधिकाऱ्यांसह शिवसैनिकांमध्ये संभ्रम निर्माण झाला आहे. त्यामुळे ग्रामीणचे जिल्हाप्रमुख मारुती धिर्डे यांनी शिवसैनिकांना भावनिक आवाहन केले. राज्याचे मुख्यमंत्री तथा शिंदे गट शिवसेनेचे प्रमुख एकनाथ शिंदे यांनी शहापूर विधानसभा क्षेत्रात गेल्या वर्षभरात ३०० कोटीपेक्षा जास्त विकासकामे मंजूर केली आहेत.

शहापूर तालुक्यातील पाणीटंचाई कायमची दूर करण्यासाठी भावली पाणीपुरवठा योजनामंजूर करून त्याचे कामही सुरू करण्यात आले आहे. मुख्य रस्त्यांना अंतर्गत रस्ते जोडणे, पर्यटन, तीर्थक्षेत्र विकास, जलजीवन मिशन पाणी योजना, आरोग्य सुविधा, तालुक्यातील गोरगरीब रुग्णांना मुख्यमंत्री सहायता निधीतून मदत, अशी अनेक कामे केली आहेत. या पुढेही अशीच विकास कामे आपण करून घेणार असल्याने जिल्ह्यातील सर्व शिवसेना पदाधिकारी, महिला आघाडी, युवा सेना, अंगिकृत संघटना आणि शिवसैनिकांनी जोमाने कामाला लागावे. तसेच येणाऱ्या विधानसभेच्या निवडणुकीत आपण नवीन चेहऱ्याला संधी देऊन आपला हक्काचा आमदार निवडून देऊ. कामाने उत्तर देणाऱ्या व सर्वसामान्यांसाठी अहोरात्र मेहनत घेणाऱ्या मुख्यमंत्री एकनाथ शिंदे यांच्यासोबत राहू, असे आवाहन मारुती धिर्डे यांनी केले.