पनवेल, ता. ३१ (बातमीदार) : विधानसभा सार्वत्रिक निवडणुकीच्या पार्श्‍वभूमीवर पनवेल मतदारसंघामध्ये मतदारांनी आपला मतदानाचा अधिकार बजावावा, याकरिता मोठ्या प्रमाणात जनजागृती करण्‍यात येत आहे. महापालिका आयुक्त मंगेश चितळे यांच्या निर्देशानुसार व स्वीपप्रमुख संजय कटेकर यांच्या मार्गदर्शनाखाली नुकताच मतदान जनजागृती कार्यक्रमांतर्गत डेएनयूएलएम विभागामार्फत कळंबोली येथे बचत गटातील महिलांकरिता बैठक घेण्यात आली. तसेच, मंगळवारी (ता. २९) मतदान जनजागृतीसाठी तळोजा फेज एक येथे बचत गटातील महिलांची बैठक व रॅली काढण्यात आली. या वेळी डेएनयूएलएमच्या विनया म्हात्रे, नवनाथ पवार, अभियंता गजानन देशमुख, अभियंता प्रसाद परब व बचत गटातील महिला मोठ्या संख्येने उपस्थित होत्या. स्वीप कार्यक्रमांतर्गत मतदान जनजागृती कार्यक्रम राबविण्यासाठी स्वीप पथकप्रमुख शहरअभियंता संजय कटेकर यांच्या नेतृत्वाखाली पनवेल महापालिका हद्दीतील महाविद्यालयामध्ये तसेच शाळांमध्ये विविध कार्यक्रमांचे आयोजन करण्यात येत आहे. यामध्ये प्रामुख्याने प्रभातफेरी, बाइक रॅली, सायकल रॅली काढणे, वक्तृत्व, घोषवाक्ये, चित्रकला स्पर्धा, बचत गटातील महिलांची बैठक व रॅली काढण्यात येत आहे.