विनायक पवार : सकाळ वृत्तसेवा
तारापूर, ता. ३१ : कांद्याची आवक कमी झाल्याने गेल्या दोन आठवड्यात कांद्याचे भाव चार पटीने वधारले आहेत. डिसेंबरपर्यंत आवक कमी राहणार असल्याने येत्या काळात भाव कायम राहण्याची शक्‍यता व्यापाऱ्यांनी व्यक्त केली आहे. त्यामुळे गेले काही दिवस स्वस्तात मिळणारा कांदा आता ग्राहकांना रडवत असल्याचे चिन्हे बोईसर भाजीपाला बाजारात दिसत आहे.

एक महिन्यापूर्वी ३५ ते ४० रुपये असलेला कांदा आता ६० ते ७० रुपये प्रतिकिलो दराने विकला जात आहे. किरकोळ बाजारात हा कांदा ६५ ते ७० रुपये दराने मिळत आहे. बोईसर बाजारात दररोज पाच ते सहा गाड्यांची आवक सुरू असली तरी कांदे महाग झाल्याने भाव वाढले आहेत. यापूर्वीही एवढ्याच गाड्यांची आवक बोईसरमध्ये दररोज होत होती. येत्या काळात ही आवक कमीच राहण्याची शक्‍यता आहे. तसेच शेतकऱ्यांकडून व्यापारी कांदा विकत घेतात आणि तो साठवून ठेवतात. अशाप्रकारे कांद्याची कृत्रिम टंचाई व्यापाऱ्यांकडून केली गेली असल्याची शक्‍यता नाकारता येत नाही, अशीही चर्चा सुरू आहे.

मध्यप्रदेशातील कांदा पूर्णपणे बाजारात आला असून, दहा टक्के कांदे व्यापारी आणि शेतकऱ्यांनी साठवून ठेवले आहेत. दक्षिण भारतात यंदा काद्यांचे उत्पादन कमी होण्याची शक्‍यता वर्तविण्यात येत आहे. त्यामुळे महाराष्ट्रातील शेतकऱ्यांनीही घसरलेल्या भावावर नियंत्रण मिळविण्यासाठी मोठ्या प्रमाणात कांदा साठवून ठेवला आहे. मतदानानंतर नवीन सरकार साठेबाजांवर कारवाईचा बडगा उगारेल, अशी अपेक्षा आहे. त्यामुळे साठवून केलेले कांदा पुन्हा बाजारात येऊन कांद्याचे भाव पुन्हा पूर्वपदावर येण्याची शक्यता आहे.

ऐन दिवाळीच्या काळात कांद्याच्या वाढलेल्या भावामुळे कुटुंबाने बजेट संपूर्ण कोलंडले असून सरकारने तत्काळ कांद्याच्या वाढलेल्या किमतीबाबत ठोस निर्णय घेऊन सामान्य नागरिकांना दिलासा द्यावा.
- सुनंदा पवार, गृहिणी

राज्यभर नुकत्याच झालेल्या अतिवृष्टीचा मोठा फटका कांद्याच्या पिकाला बसला असून हंगामही लांबणीवर गेला आहे. त्यामुळे घाऊक बाजारात जुन्या कांद्याच्या दराने उसळी मारली आहे. नाशिकमधील लासलगावमध्ये कांद्याचे ६० टक्के उत्पादन होते, मात्र सध्या बाजारात कांद्याला जेवढी मागणी आहे, त्या प्रमाणात पुरवठा होत नसल्याने कमतरता होत आहे. त्यामुळे कांद्याचे भाव वाढले आहेत.
- रत्नाकर शिंदे,
कांदा व्यापारी, बोईसर