कासा, ता. ३१ (बातमीदार) : सूर्या प्रकल्पाच्या उजव्या तीर कालव्याचे नूतनीकरण आणि सिंचन सुधारण्याच्या उद्देशाने २०२४-२५ च्या सिंचन हंगामात १५ डिसेंबर २०२४ ते मे २०२५ या कालावधीत कासा परिसरातील सिंचन आवर्तन बंद ठेवण्यात येणार आहे. जलसंपदा विभागाच्या या निर्णयामुळे आगामी काही महिन्यांमध्ये या कालव्यामधून पाणी सोडले जाणार नाही.

पालघर जिल्ह्यातील सुमारे नऊ हजार १०० हेक्टर क्षेत्राला सिंचनासाठी पाणीपुरवठा करणारा सूर्या प्रकल्पाचा उजवा तीर कालवा एकूण २९ किलोमीटर लांबीचा आहे. हा कालवा खूप जुना झाल्यामुळे ठिकठिकाणी गळती होत आहे. त्यामुळे शेवटच्या गावांपर्यंत पाणी पोहोचत नव्हते. पाटबंधारे विभागाने थेरोंडा ते सोनाळे या सात किलोमीटर पट्ट्यातील कालव्याच्या दुरुस्तीचे काम हाती घेतले आहे.

१९८२ मध्ये सूर्या प्रकल्पातून विक्रमगड, डहाणू आणि पालघर या आदिवासीबहुल भागातील शेतीसाठी सिंचनाच्या सुविधेसाठी उजवा आणि डावा तीर कालव्यांची निर्मिती करण्यात आली होती, मात्र गेल्या काही वर्षांपासून पाण्याची गळती होऊन शेवटच्या गावांपर्यंत पाणी पोहोचत नाही. त्यामुळे कालवा दुरुस्ती अत्यावश्यक ठरली आहे. सूर्या उजवा तीर कालव्यावरील वाघाडी, कासा व भराड येथील लघुपाट एक व दोन आणि वितरिका क्रमांक एकच्या बंदिस्त नलिकेचे काम करण्यासाठी यावर्षी कालव्यातून पाणी सोडले जाणार नाही. याबाबतची माहिती त्या परिसरातील सरपंच, ग्रामविकास अधिकारी यांना देण्यात आली आहे.

सूर्या प्रकल्पातील कालवे खूप जुने आहेत. आतापर्यंत फक्त डागडुजी झाली होती. त्यामुळे मोठ्या प्रमाणात पाण्याची गळती होत होती. या समस्येवर कायमस्वरूपी उपाययोजना म्हणून ६५ किलोमीटर कालव्यांच्या दुरुस्तीचा प्रस्ताव सादर करण्यात आला आहे. या कामादरम्यान मे २०२५ पर्यंत सिंचन आवर्तन बंद ठेवण्यात येणार आहे.
- योगेश पाटील, कार्यकारी अभियंता, पाटबंधारे विभाग