वसई, ता. ३१ (बातमीदार) : दिवाळी सणाला खुसखुशीत चकलीसोबत पहाट गीतांच्या फराळाची शहरातील रसिकांना मेजवानी मिळाली. त्याला वसई-विरारमधील नागरिकांनी भरभरून दाद मिळाली. या कार्यक्रमाचे निमित्त होते ते म्हणजे वसई वाय. एम. सी. एम. सभागृहात महापालिकेकडून आयोजित ‘प्रभाती सूर नभी रंगती’ हा गीतांचा कार्यक्रम.

‘लख लख चंदेरी तेजाची’ या गीताने दिवाळी पहाट कार्यक्रमाला सुरुवात आली. त्यानंतर एकापेक्षा एक अनेक बहारदार गाण्यांची मैफल रंगत गेली व वसईकर रसिक मंत्रमुग्ध झाले. सप्तसुरी बहारदार गीतांची मैफल सजली होती. गायक अजित परब, सुगंधा दाते, ओंकार प्रभुघाटे, माधुरी करमरकर या गायकांनी गाणी सादर केली. त्यांना वादक म्हणून प्रशांत लळित, सागर साठे, विजय तांबे, सूर्यकांत सुर्वे, प्रभाकर मोसमकर, अभिजित सावंत यांची साथ मिळाली. सुसंवादिका मंगला खाडिलकर यांनी ज्येष्ठ गायक, संगीतकारांच्या आठवणींना उजाळा दिला व कार्यक्रम उत्तरोत्तर रंगत गेला. या वेळी महापालिकेच्या कला-क्रीडा व आस्थापना विभागाचे उपायुक्त सदानंद पुरव, सहाय्यक आयुक्त ग्लिसन गोन्साल्विस, संजू पाटील, माजी महापौर नारायण मानकर, माजी उपमहापौर प्रकाश रॉड्रिग्ज, माजी सभापती संदेश जाधव, नितीन राऊत, अशोक मुळे, विजय वर्तक, पुष्पा जाधव, प्रकाश वनमाळी, कल्पेश मानकर, मीना अडसूळ, स्नेहल वेदपाठक, माया तळेकर यांच्यासह मोठ्या संख्येने रसिक उपस्थित होते.

गायक ओंकार प्रभुघाटे यांनी आपल्या सुरेल आवाजात ‘इंद्रायणी काठी’, गायिका माधुरी करमकर यांनी ‘केतकीच्या बनी तिथे नाचला गं मोर’, मंगेश पाडगावकर यांचे ‘लाजून हासणे अन हासून ते पहाणे’ हे गाणे गायक अजित परब, तर ‘गोरी गोरी पान’ हे गाणे सुगंधा दाते यांनी सादर केले. ‘घनराणी साजणा’, ‘असा बेभान हा वारा’, ‘काटा रुते कुणाला’, ‘दिवस तुझे हे फुलायचे’, ‘राजाच्या रंगम्हाली’, ‘लटपट लटपट तुझं चालणं’, ‘विंचू चावला’, ‘कानडा राजा पंढरीचा’, ‘विठूचा गजर हरिनामाचा’, ‘गुंतता हृदय’ हे नाट्यपद, ‘या जन्मावर, या जगण्यावर’, ‘जिवलगा कधी रे येशील तू’, ‘नवीन आज चंद्रमा’, ‘नवीन आज यामिनी’, ‘अवघे गर्जे पंढरपूर’, ‘दिस चार झाले मन’, ‘मनाच्या धुंदीत लहरीत येना’ अशा अनेक गाण्यांनी रसिकांना दिवाळीच्या पहिल्या पहाटे नवी ऊर्जा दिली.