बदलत्या ऋतूमध्ये आजारात वाढ
ऋतूजन्य आजार टाळण्याकरिता पालिकेचे नागरिकांना आवाहन
पनवेल, ता. ३१ (बातमीदार) ः वातावरणामध्ये अनेक बदल दिसून येत असून नुकताच पावसाळा संपला आहे. तर काही दिवसातच हिवाळा सुरू होणार आहे. सध्या ऑक्टोबर हिट सर्वत्र सुरू आहे. या पार्श्वभूमीवर ऋतूजन्य आजार टाळण्याकरिता नागरिकांनी काळजी घेण्याचे आवाहन आयुक्त मंगेश चितळे यांनी केले आहे. तसेच महापालिकेने दिलेल्या सूचनांचे पालन करून नागरिकांनी पुरेशी दक्षता बाळगल्यास या आजारांवर वेळीच प्रतिबंध घालणे शक्य आहे, असे सांगण्यात येत आहे.
वातारवरणीय बदलामुळे सध्या ऋतूजन्य आजार जसे की इन्फूएंझा यामध्ये टाईप एच वन, एन वन, एच तीन, एन दोन असे आजार आढळून येत आहे. या आजारामध्ये रूग्णाला ताप, खोकला, घशात खवखव, धाप लागणे, अंगदुखी अशी लक्षणे दिसून येत आहेत. या चबरोबर कीटकजन्य आजार दिसून येत आहेत.असे असले तरी मागील महिन्यापेक्षा या महिन्यातील महापालिका क्षेत्रातील विविध आजारांचा पॉझीटीव्हीटी रेट कमी आहे. त्यामुळे नागरिकांनी घाबरून जाऊ नये. शासनाने दिलेल्या सूचनेप्रमाणे महापालिकेच्यावतीने नियमितपणे घरोघरी सर्वेक्षण सुरू आहे. या सर्वेक्षणादरम्यान कंटेनर सर्वेक्षण, फिव्हर सर्वेक्षण व बांधकाम क्षेत्रातील सर्वेक्षण करण्यात येत आहे. नागरिकांनी ताप, सर्दी, खोकला अशा प्रकारची लक्षणे असल्यास नजिकच्या नागरी प्राथमिक आरोग्य केंद्राशी संपर्क साधावा, असे आवाहन मुख्य वैद्यकिय अधिकारी डॉ. आनंद गोसावी यांनी केले आहे.
...................
महापालिकेच्‍या सूचना
नागरिकांनी सतर्क होऊन आपल्या आरोग्याची काळजी घेऊन आपल्या आजूबाजूची डासोत्पत्तीची स्थाने नष्ट होतील याची दक्षता घ्यावी. सर्व केरकचरा घंटा गाडीतच टाकावा. घर व सभोवतालचा परिसर जास्तीत जास्त स्वच्छ ठेवावा. आपल्या इमारतीतील पाण्याची टाकी निर्जंतुक करावी. साचलेले पाणी, डबकी यातील पाणी वाट काढून वाहून जाईल, अशी सोय करावी. जेणे करून डास उत्पन्न होणार नाहीत. महापालिकेच्या वैद्यकिय आरोग्य विभागाच्यावतीने दिलेल्या सूचनांचे पालन नागरिकांनी करण्याचे आवाहन उपायुक्त डॉ. वैभव विधाते यांनी केले आहे.
....................

चौकट
ऋतूजन्य आजार टाळण्याकरिता प्रतिबंधात्मक उपाय
संसर्ग प्रतिबंध आणि नियंत्रणासाठी ''काय करावे'' आणि ''काय करू नये''
■ काय करावे''
1.मास्क घाला आणि गर्दीच्या ठिकाणी जाणे टाळा.
2.शिंकताना आणि खोकताना तोंड आणि नाक रुमालाने किंवा कपड्याने अवश्य झाकून घ्या.
3.भरपूर द्रव पदार्थांचे सेवन करा.
4.डोळे आणि नाकाला स्पर्श करणे टाळा.
5.ताप आणि अंगदुखी असेल तर पॅरासिटामॉल घ्या.

■ काय करू नये.
1.हस्तांदोलन किंवा अन्य प्रकारे संपर्क होईल असे अभिवादन करु नका.
2.सार्वजनिक ठिकाणी थुंकू नका.
3.डॉक्टरांच्या सल्ल्यांशिवाय प्रतिजैविक किंवा इतर औषधे घेऊ नका.