भिवंडी, ता. २९ (वार्ताहर)ः आपत्कालीन परिस्थितीत राज्य शासनाने कर्मचाऱ्यांच्या सुट्ट्या रद्द करत कर्मचाऱ्यांना तत्काळ कामावर हजर करण्याचे निर्देश दिले आहेत, मात्र असे असताना भिवंडी पालिकेचे कर्मचारी मात्र रजेवर असल्याने आमदार रईस शेख यांनी अधिकाऱ्यांची खरडपट्टी काढली.
आपत्कालीन परिस्थितीचा आढावा घेण्यासाठी आमदार शेख यांनी बुधवारी पालिका मुख्यालयात आढावा बैठक घेतली. या वेळी आमदारांसमोर कर्मचारी रजेवर असल्याचा मुद्दा समोर आला. या वेळी आमदारांनी पालिकेच्या वरिष्ठ अधिकाऱ्यांना जाब विचारत कर्मचाऱ्यांच्या सुट्ट्या तत्काळ रद्द करण्याच्या सूचना दिल्या. तसेच राज्याच्या मुख्य सचिवांना तक्रार निवेदन देणार असल्याचेही शेख यांनी सांगितले. या वेळी शहरातील नालेसफाईच्या कामांचा आढावा बैठकीत घेण्यात आला. शहरातील नालेसफाईची कामे व्यवस्थित झाली नसल्याने आमदार शेख यांनी नालेसफाईच्या कामाबाबत तीव्र नाराजी व्यक्त केली, तर बकरी ईद सणानिमित्त शहरात आवश्यक त्या उपाययोजना करण्याच्या सूचना प्रशासनाला दिल्या आहेत.
-------------------------------------------
वाहतूक कोंडीचा आढावा
शहरातील वाहतूक कोंडी सोडविण्यासाठी लवकरच वाहतूक पोलिस प्रशासन, पालिका प्रशासनासोबत संयुक्त बैठक घेण्यात येणार आहे. तसेच शहरातील वाहतूक कोंडीची समस्या सोडविण्यासाठी उपाययोजना करण्यात येणार असल्याची माहिती आमदार शेख यांनी सांगितले.