सात वर्षांच्या अल्पवयीन मुलीवर लैंगिक अत्याचार
खाजगी शिक्षकाला अटक व कोठडी
अंधेरी, ता. १९ (बातमीदार) ः सात वर्षांच्या अल्पवयीन मुलीवर खाजगी शिकवणीच्या ४४ वर्षीय शिक्षकाने लैंगिक अत्याचार केल्याची घटना गोरेगाव परिसरात उघडकीस आली आहे. याप्रकरणी लैगिंक अत्याचारासह पोक्सोच्या कलमांतर्गत गुन्हा दाखल झाला असून आरोपीला दिंडोशी पोलिसांनी बुधवारी (ता. १६) अटक केली आहे. अटकेनंतर त्याला दिंडोशीतील पोक्सो न्यायालयाने पोलिस कोठडी सुनावली आहे.
अल्पवयीन पीडिता आरोपीच्या राहत्या घरी खाजगी शिकवणी घेत होती. ऑगस्ट २०२४ ते जुलै २०२५ या कालावधीत मुलीला मोबाईलवर गेम दाखविण्याचा बहाणा करुन तिला बेडरुममध्ये नेत आणि तिच्यावर लैंगिक अत्याचार करत होता. सुरुवातीला तिने हा प्रकार कोणालाही सांगितला नाही. मात्र, अलीकडेच ही माहिती या मुलीकडून तक्रारदारांना समजली होती. यानंतर तक्रारदारांनी तातडीने दिंडोशी पोलिसांत आरोपी शिक्षकाविरुद्ध तक्रार केली होती. याप्रकरणी विविध कलमांतर्गत गुन्हा दाखल होताच आरोपीला पोलिसांनी अटक केली असून न्यायालयाने त्याला पोलिस कोठडी सुनावली आहे.