घाटकोपरच्या कातोडीपाडा परिसरात शिरलेत माकड आणि साप
नागरिकांमध्ये भीतीचे वातावरण
घाटकोपर, ता. १९ (बातमीदार) ः पश्चिमेकडील कातोडीपाडा परिसरात माकड आणि विविध जातीचे साप घरात शिरत असल्याने नागरिकांमध्ये भीतीचे वातावरण पसरले आहे. काही वर्षापूर्वी येथे रस्ता बनवण्यासाठी शेकडोहून अधिक घरे निष्कासित करण्यात आली मात्र तोडलेल्या घरांचे ढाचा अद्यापही तसाच असल्याने सापांना बिळ बनवण्यासाठी वाव मिळत आहे. त्यामुळे पावसाळ्यात तसेच इतरही वेळी साप घरात शिरत असल्याचे येथील रहिवाशांनी सांगितले. दोन दिवसापूर्वी काही माकड आणि काही साप पंचशील नगर भागातील काही घरात शिरल्याने नागरिकांमध्ये भीती निर्माण झाली.
घाटकोपर पश्चिम हा भाग डोंगराळ असून कातोडी पाडा, भीमनगर, खंडोबा टेकडी हे परिसर या भागात येतात. काही वर्षांपूर्वी कातोडी पाडा येथून रस्ता करण्यासाठी असलेली काही घरे तोडण्यात आली. रस्त्याचे काम अद्याप झाले नसून मात्र घराचे रेबिट पूर्णतः उचलण्यात आलेले नाही. तसेच कातोडी पाडा परिसराच्या वरच्या बाजूस डोंगर असून खंडोबा टेकडी ही उंच भागावर आहे. त्या परिसराच्या काही भागातील तीनशे ते चारशे झाडे हिरानंदानी या विकासकाने तोडल्याचा प्रकार उघडकीस आला. मुंबईच्या उपनगरातील हे काही छोट्या प्रमाणात असलेले हिरवळ जंगल देखील तोडण्याचा प्रकार उघडकीस आल्याने या भागातून साप, माकड व इतर जनावर खंडोबा टेकडीच्या आजूबाजूच्या परिसरात शिरत असल्याने नागरिकांमध्ये एकच भीती निर्माण होत आहे. नागरिक प्राणी मित्रांना बोलावून हे साप पकडत आहेत.