पालघर (बातमीदार) : राज्य सरकारच्या कौशल्य, रोजगार, उद्योजकता व नाविन्यता विभागाच्या वतीने राज्यभर चालू आर्थिक वर्षात एक हजार रोजगार मेळावे आयोजित करण्याचे उद्दिष्ट ठेवण्यात आले आहे. त्या अनुषंगाने पालघर जिल्ह्यातही अंदाजे २० रोजगार मेळावे घेण्यात येणार आहेत. यातील पहिला मेळावा मंगळवारी (ता. २२) यशवंतराव चाफेकर कॉलेजमध्ये आयोजित केला आहे. या रोजगार मेळाव्याचे आयोजन पालघर जिल्हा कौशल्य विकास, रोजगार व उद्योजकता मार्गदर्शन केंद्र आणि पालघर यशवंतराव चाफेकर कॉलेज यांच्या संयुक्त विद्यमाने करण्यात येत आहे. या मेळाव्याच्या माध्यमातून जिल्ह्यातील, तसेच राज्यभरातील तरुणांना विविध खासगी कंपन्यांमध्ये रोजगाराच्या संधी उपलब्ध होणार आहेत. या पार्श्वभूमीवर कंपन्यांनी https://rojgar.mahaswayam.gov.in या पोर्टलवर त्यांच्या रिक्त पदांची नोंदणी करावी, असे आवाहन सहाय्यक आयुक्त रेणुका तम्मलवार यांनी केले आहे.