वसईत स्वयंपुनर्विकास विषयावर मार्गदर्शन
मुंबई, ता. १९ ः स्वयंपुनर्विकास कृती समिती, वसईतर्फे रविवारी (ता. २०) ‘स्वयंपुनर्विकास मार्गदर्शन’ शिबिराचे आयोजन केले आहे. अपुलेंट ग्रॅण्ड बॅंक्वेट हॉल, कौल हेरिटेज सिटी, वसई (पश्चिम) येथे संध्याकाळी चार वाजता आयोजित केलेल्या ‘स्वयंपुनर्विकास मार्गदर्शन’ शिबिराला भाजपा गटनेते व मुंबई जिल्हा बँकेचे अध्यक्ष आमदार प्रवीण दरेकर यांची प्रमुख उपस्थिती आणि मार्गदर्शन लाभेल. तसेच महापालिकेचे अधिकारी, उपनिबंधक आणि या क्षेत्रातील तज्ज्ञ मंडळींचेही मार्गदर्शन मिळेल. ३० वर्षांपासून जुन्या झालेल्या इमारतींचा पुनर्विकास करणे आवश्यक आहे. हा पुनर्विकास करताना तेथील नागरिकांना कुणी फसवू नये, लुबाडणूक होऊ नये आणि त्यांना त्यांच्या आताच्या राहत्या घरापेक्षा मोठे घर मिळावे, हाच हेतू समोर ठेवून स्वयंपुनर्विकास शिबिराचे आयोजन केले आहे. आपल्या स्वतःच्या घराचा पुनर्विकास करण्यासाठी शिबिराला मोठ्या संख्येने उपस्थित राहावे, असे आवाहन निमंत्रक आणि वसईच्या भाजपा आमदार स्नेहा दुबे-पंडित यांनी केले आहे.