पालघर, ता. २० (बातमीदार) : डहाणू-विरार रेल्वे मार्गाच्या चौपदरीकरणाचे काम मार्च २०२७ मध्ये पूर्ण होईल आणि सुरक्षा प्रमाणपत्र मिळाल्यावर या मार्गावरून डहाणू लोकलच्या अधिकच्या फेऱ्या उपलब्ध होतील, असे गेल्या महिन्यात मुंबई रेल्वे विकास कॉर्पोरेशन लिमिटेडने माहिती अधिकार कायद्यांतर्गत माहिती दिली होती. या परिसरातील गर्दीचा विचार करता नोव्हेंबरमधील नवीन वेळापत्रकात डहाणू लोकलच्या किमान दहा फेऱ्या सुरू करणे आवश्यक आहे, अशी मागणी डहाणू-वैतरणा प्रवासी संस्थेने केली आहे.

विरारनंतर वैतरणा ते डहाणूदरम्यान गेल्या काही वर्षांत नागरीकरण मोठ्या प्रमाणात वाढू लागले आहे. डहाणू विभागातून मोठ्या संख्येने प्रवासी मुंबईसाठी प्रवास करतात; परंतु सध्या या विभागात धावणाऱ्या डहाणू लोकलच्या फेऱ्या अपुऱ्या पडत आहेत. प्रवाशांना अत्यंत त्रासदायकरीत्या गर्दीचा सामना करीत प्रवास करावा लागत आहे.

कोरोना काळात सफाळे स्थानकात थांबणारी लोकशक्ती एक्स्प्रेसचा थांबा रद्द करण्यात आला. तो आजतागायत पुन्हा सुरू करण्यात आलेला नाही. या गाडीऐवजी लोकल फेरी उपलब्ध करून द्यावी, अशी मागणी वाढू लागली आहे. डहाणू लोकलच्या किमान प्रत्येकी पाच अप-डाऊन फेऱ्यांची आवश्यकता आहे. न्यू उमरगाव ते न्यू सफाळे असा मालवाहतूक रेल्वे मार्ग सुरू झाला आहे. त्यामुळे पश्चिम रेल्वेच्या मुख्य मार्गावरील अंदाजे २० मालगाड्या या मार्गावर वळवण्यात आल्याने प्रवाशांसाठी फेऱ्या वाढवणे शक्य आहे.

डहाणू लोकलच्या अपेक्षित किमान पाच फेऱ्या
डहाणूहून मुंबईकडे (अप)
- पहाटे ३.५०
- सकाळी ८.३०
- संध्याकाळी ४.४५
- संध्याकाळी ६.१५
- रात्री ११.३०

विरारहून डहाणूकडे जाण्यासाठी (डाऊन)
- सकाळी ७.३०
- दुपारी २.३०
- संध्याकाळी ५.३०
- रात्री ८.००
- रात्री १०.१५