‘शहीद योगेश पाटील यांच्या मातोश्रीला न्याय द्या’
खारघरवासीयांचे पोलिसांना निवेदन
खारघर, ता. २० (बातमीदार) : मुंबई दहशतवादी हल्ल्यात वीरमरण आलेल्या शहीद योगेश पाटील यांच्या आई सुनीता पाटील यांना सरकारने उदरनिर्वाहासाठी पेट्रोलपंप उपलब्ध करून दिला आहे. दरम्यान, तळोजामधील आठ-नऊ तरुणांनी पेट्रोलपंपावर धुडगूस घालत कर्मचाऱ्यांना बेदम मारहाण केली आणि पेट्रोलपंप पेटवून देण्याची धमकी दिली. यावर खारघरवासीयांनी संताप व्यक्त केला असून, गुन्हेगारांवर योग्य ती कारवाई करावी, यासाठी वरिष्ठ पोलिस निरीक्षकांची भेट घेऊन निवेदन दिले.
खारघर सेक्टर १४ मधील शहीद योगेश पाटील पेट्रोलपंपावर गुरुवार (ता. १७) रात्री साडेनऊच्या सुमारास दुचाकी घेऊन आले. या वेळी तरुण आणि कमर्चारी यांच्यात किरकोळ वाद झाला. पंपावरील मॅनेजर आणि इतर कर्मचाऱ्यांनी वाद मिटवण्याचा प्रयत्न केला, परंतु तरुणाने आठ ते नऊ मित्रांना बोलावून पेट्रोलपंपावरील कर्मचारी रविकुमार यास मारहाण केली. तसेच योगेश पाटील यांची आई आणि इतर सहकारी महिलांना अश्लील भाषेत शिवीगाळ करीत पंप पेटवून देण्याची धमकी दिली. या प्रकारामुळे कर्मचारीवर्गात भीतीचे वातावरण पसरले आहे. दरम्यान, गुन्हेगारांवर योग्य ती कारवाई करावी यासाठी खारघरवासीयांनी शनिवारी (ता. १९) पोलिसांना निवेदन दिले. या वेळी खारघरमधील नागरिक मोठ्या संख्येने पोलिस ठाण्याच्या आवारात जमले होते.