कासा, ता. २० (बातमीदार) : तलासरी पोलिस ठाणे हद्दीत एप्रिलमध्ये घडलेल्या जबरी चोरीप्रकरणी दोन महिन्यांपासून फरार असलेल्या अट्टल गुन्हेगाराला अखेर पालघर पोलिसांनी अटक करत मोठे यश मिळवले आहे. त्याच्या विरोधात यापूर्वीही खून, खुनाचा प्रयत्न, जबरी चोरी व इतर गंभीर स्वरूपाचे १० गुन्हे दाखल आहेत.

२० एप्रिलच्या दुपारी संदीप भैयालाल पारधी (वय ३८, रा. ता. वाडा) हे कारमधून तलासरीतील उपलाट-कलबटपाडा येथे थांबले असताना तीन अज्ञात व्यक्तींनी त्यांची गाडी अडवली. मोटारसायकल आडवी लावून त्यांना गाडीतील मागील सीटवर जबरदस्तीने बसवून अपहरण करण्यात आले. आरोपींनी त्यांच्या गळ्यातील सोनसाखळी, अंगठी आणि रोख रक्कम, असा एकूण पाच लाखांचा मुद्देमाल हिसकावून घेतला व कल्याण बायपासजवळ सोडून दिले होते.

याप्रकरणी तलासरी पोलिस ठाण्यात गुन्हा दाखल करण्यात आला होता. यातील एक आरोपी विशाल दत्तात्रय तांदळे (रा. मंचर, पुणे) याला ५ मे रोजी अटक करण्यात आली होती. त्याच्याकडून चोरीची गाडी, सोन्याचे दागिने व रोख रक्कम जप्त करण्यात आली होती. दुसरा आरोपी समीर महादेव जाधव (रा. मंचर, पुणे) हा गुन्ह्यानंतर फरार होता. गोपनीय माहिती व तांत्रिक विश्लेषणाच्या आधारे पोलिसांनी त्याचा ठावठिकाणा शोधून काढला. त्यानुसार गुरुवारी (ता. १७) त्याला मंचर येथून ताब्यात घेण्यात आले. शुक्रवारी (ता. १८) न्यायालयात हजर केले असता त्याला चार दिवसांची पोलिस कोठडी सुनावण्यात आली.