ईव्हीएम यंत्र फेरतपासणी फसवी; शिवसेना ठाकरे गटाचा आरोप
सकाळ वृत्तसेवा
ठाणे, ता. २० : विधानसभा निवडणुकीत झालेल्या मतदानाच्या शंकांचे निरसन करण्यासाठी निवडणूक आयोगाने ईव्हीएम यंत्र फेरतपासणी घेतली, मात्र या वेळी ईव्हीएमची बीयू, सीयू, व्हीव्हीपॅट पडताळणी न करता केवळ मशीन सुरू करून एकूण मतदान दाखवण्यात आले. ठरल्याप्रमाणे कुणाला किती मतदान झाले हे दाखवणे अपेक्षित असताना येथेही निवडणूक आयोगाने सफाईने लपवाछपवी केली आहे. त्यामुळे ईव्हीएम यंत्र फेरतपासणी फसवी असल्याचा आरोप करत शिवसेना ठाकरे गटाचे नेते, माजी खासदार राजन विचारे यांनी संताप व्यक्त केला आहे.
विधानसभा निवडणुकीत पराभवाचा सामना झाल्यानंतर ही ‘मॅच फिक्सिंग’ असल्याचा आरोप महाविकास आघाडीने केला होता. वाढीव मतदानासह संपूर्ण प्रक्रियेवर संशय व्यक्त करत सर्वोच्च न्यायालयात धाव घेण्यात आली. दरम्यान, ठाणे विधानसभा मतदारसंघातील माजी खासदार राजन विचारे यांनीही ईव्हीएम मशीनसंदर्भात संशय व्यक्त केला होता. त्यामुळे निवडणूक आयोगाने न्यायालयाच्या आदेशाने ठाणे जिल्हा आणि यवतमाळ या दोन जिल्ह्यांच्या मतदानाची फेरतपासणी घेतली.
नवी मुंबई येथील तुर्भे स्टोअर येथे उमेदवार प्रतिनिधींच्या उपस्थितीत ही तपासणी करण्यात आली. ही तपासणी सुरू असताना ईव्हीएमची बीयू, सीयू, व्हीव्हीपॅट तपासणी व पडताळी आवश्यक होती. त्यामुळे झालेले एकूण मतदान आणि यंत्रामध्ये नोंदवले गेलेले मतदान यामधील तफावतीचा संशय दूर होणार होता, मात्र हा संशय तसाच कायम ठेवत निवडणूक आयोगाने यंत्रात नोंद झालेले एकूण मतदान दाखवून ते तत्काळ बंद केल्याचा आरोप ठाकरे गटाने केला आहे.
---------------------------
सीसीटीव्ही फुटेजची मागणी
मतदान झाल्यानंतर ईव्हीएम मशीनच्या बॅटरी काढून घेतल्या जातात, पण तुर्भे येथे झालेल्या पडताळणीत अनेक यंत्रांमध्ये बॅटरी आढळून आल्या असल्याची माहिती राजन विचारे यांनी दिली. तसेच मशीन तीन सत्रांमध्ये सुरू असलेल्या दिसायला पाहिजे, त्या चार सत्रांमध्ये दिसत होत्या. त्यामुळे मतदान केंद्रावरील निवडणूक निर्णय अधिकारी यांच्या उपस्थितीत झालेल्या कागदपत्रांची तसचे सीसीटीव्ही फुटेज उपलब्ध करून देण्याची मागणी आता शिवसेना ठाकरे गटाचे नेते राजन विचारे यांनी केली आहे.