नवी मुंबई महापालिका पद भरतीला प्रतिसाद
परीक्षेत ६८, १४९ उमेदवारांनी ऑनलाइन दिली परीक्षा
वाशी, ता. २० (बातमीदार) : नवी मुंबई महापालिका सरळ सेवा भरती २०२५ अंतर्गत गट क आणि गट ड मधील एकूण ३० संवर्गांतील ६६८ पदांकरिता ८४, ७७४ अर्ज प्राप्त झाले होते. या पदांकरिता १६ ते १९ जुलैदरम्यान ऑनलाइन स्पर्धा परीक्षा सुरळीत पार पडली. ११ जिल्ह्यांमध्ये २८ परीक्षा केंद्रांवर ही परीक्षा घेण्यात आली. परीक्षेच्या चार दिवसांत एकूण ६८ हजार १४९ उमेदवारांनी ऑनलाइन परीक्षा दिली. सर्व केंद्रांवरली परीक्षा प्रक्रिया व्यवस्थित पार पडली.
श्रीमंत महापालिका म्‍हणून नवी मुंबई महापालिकेकडे पाहिले जाते. मागील काही वर्षांत महापालिकेचे उत्‍पन्न वाढत आहे. शिवाय अनेक विकासात्‍मक प्रकल्‍प राबविण्यात येत आहेत. त्‍यामुळे विविध प्रकल्‍पांसाठी तसेच नागरिकांना सोयीसुविधा पुरविण्यासाठी मनुष्यबळाची कमतरता लागू नये, यासाठी महापालिकेकडून मोठ्या प्रमाणात भरती प्रक्रिया राबविण्यात येत आहे. त्‍यासाठी गट क आणि ड मधील एकूण ३० संवर्गांसाठी ६६८ पदांकरिता अर्ज मागविण्यात आले होते. त्‍याला राज्यभरातून मोठ्या प्रमाणात प्रतिसाद मिळाला. या विविध पदासाठी ८४,७७४ अर्ज प्राप्त झाले होते. दरम्यान, ही परीक्षा १६ ते १९ जुलैदरम्यान ऑनलाइन पद्धतीने राबविण्यात आली. गट क आणि गट ड मधील ३० संवर्गांतील ६६८ पदांकरिता १२ जिल्ह्यांमध्ये २८ केंद्रांवर टाटा कन्सल्टन्सी सर्व्हिस यांच्या माध्यमातून परीक्षेचे नियोजन करण्यात आले होते. या परीक्षा प्रक्रियेवर निरीक्षण व नियंत्रण ठेवण्यासाठी महापालिका आयुक्त डॉ. कैलास शिंदे यांच्या मार्गदर्शनाखाली नवी मुंबई महापालिकेच्या वर्ग १ श्रेणीतील वरिष्ठ अधिकाऱ्यांची समन्वय अधिकारी म्हणून तसेच २९ अधिकाऱ्यांची केंद्र निरीक्षक म्हणून नियुक्ती करण्यात आली होती. अशाप्रकारे चार दिवसांत ६८,१४९ उमेदवारांनी २८ केंद्रांवर ऑनलाइन परीक्षा दिलेली आहे. चार दिवसांची ही संपूर्ण परीक्षा प्रक्रिया सुव्यवस्थित पार पडली. या संपूर्ण परीक्षा प्रक्रियेशी संबंधित सर्व घटकांचे तसेच १२ जिल्ह्यांतील पोलिस विभागाचे आणि उमेदवारांचे नवी मुंबई महापालिकेकडून आभार व्यक्त करण्यात येत आहेत.
.........................
बॉक्स
नवी मुंबई महापालिकेची भरती प्रक्रिया पारदर्शक व नियमानुसार काटेकोरपणे होत असून, नोकरी मिळवून देण्यासाठी कोणत्याही प्रकारची मागणी केली जात असल्यास उमेदवारांनी दक्ष राहावे व स्थानिक पोलिसांकडे तक्रार करावी, असे सूचित करण्यात येत आहे. भरतीविषयक कोणत्याही भूलथापांना व आमिषांना बळी न पडता तसेच याबाबत अफवांवर विश्वास न ठेवता परीक्षेच्या निकालाविषयी अधिकृत माहिती जाणून घेण्यासाठी उमेदवारांनी महापालिकेचे संकेतस्थळ www.nmmc.gov.in तसेच महापालिकेच्या अधिकृत सोशल मीडिया पेजला भेट द्यावी, असे आयुक्‍त डॉ. कैलास शिंदे यांनी सांगितले.