भाईंदर (बातमीदार) : ठाणे कारागृहातून जामिनावर सुटका झाल्यानंतर मिरवणुकीने मिरा रोडमध्ये दाखल होणे सराईत गुंडाला भोवले आहे. लोकांमध्ये दहशतीचे वातावरण निर्माण केल्याप्रकरणी पोलिसांनी त्याच्यासह साथीदारांवर गुन्हा नोंदवला आहे. मिरा रोडच्या नयानगर भागात रहाणारा कामरान खान याच्यावर विविध गुन्हे दाखल आहेत. काही दिवसांपासून तो अमली पदार्थविरोधी कायद्याअंतर्गत ठाणे मध्यवर्ती कारागृहात अटकेत होता. १६ जुलैला त्याची जामिनावर सुटका झाली. त्या वेळी त्याचे अन्य साथीदार कारागृहाबाहेर जमा झाले. तो कारागृहाबाहेर येताच सर्वांनी मोठा जल्लोष केला. त्याानंतर हे सर्वजण पाच गाड्यांमधून मिरा रोडकडे रवाना झाले. मिरा रोडच्या नयानगर भागात येताच त्याचे जोरदार स्वागत करीत फटाक्यांची आतषबाजी करण्यात आली. या वेळी मोठा जमाव जमला होता. या घटनेची चित्रफीत समाजमाध्यमांवर पसरली. त्याची नयानगर पोलिसांनी गंभीर दखल घेतली. पोलिसांनी कामरान खान आणि त्याच्या साथीदारांची शनिवारी (ता. १९) सायंकाळी मिरा रोडमधून पायी वरात काढली आणि गुन्हा दाखल केला.