पालिकेकडून खारघरमध्ये मोकाट कुत्र्यांचे लसीकरण
खारघर, ता.१८ (बातमीदार) : पालिकेच्या पशुवैद्यकीय विभागाकडून खारघरमध्ये एकाच दिवशी रस्त्यावरील ७० मोकाट कुत्र्यांचे लसीकरण करण्यात आले. तर, आजारी कुत्र्यांना घेऊन गेले. यामुळे परिसरातील रहिवाशांनी समाधान व्यक्त केले आहे.
खारघर सेक्टर ३४, ३५ परिसरात मोकाट कुत्र्यांचा सुळसुळाट झाला आहे. काही दिवसापूर्वी एका दहा वर्षीय शाळकरी विद्यार्थाला मोकाट कुत्र्यांनी घेराव घातल्याची घटना घडली होती. रस्त्यावरील मोकाट कुत्र्यांचे प्रतिबंध कमी व्हावे, पशूसाठी आरोग्य केंद्र उभारावे आणि परिसरातील मोकाट कुत्र्यांचे रेबीज लसीकरण, नसबंदी करण्यात यावे अशा मागणीचे निवेदन खारघर काँग्रेस कमिटीच्या शिष्टमंडळाने अतिरिक्त आयुक्त गणेश शेटे यांना दिले होते. शेटे यांच्या आदेशानुसार पालिकेच्या पशुवैद्यकीय विभागाकडून बुधवार (ता. १७) खारघर सेक्टर ३४, ३५ परिसरातील रस्त्यावरील ७० मोकाट कुत्र्यांचे लसीकरण करण्यात आले.
खारघर महिला काँग्रेसच्या अध्यक्षा इशिका सुधीजा म्हणाल्या, अतिरिक्त आयुक्तांना निवेदन दिल्यावर तात्काळ पथक पाठवून मोकाट आणि पाळीव कुत्र्यांचे लसीकरण करण्यात आले. तीन कुत्र्यांना ट्यूमर, त्वचेचा संसर्गाची लागण झाल्याचे तपासणीच्या वेळी आढळून आल्यामुळे या कुत्र्यांना उपचारासाठी रुग्णवाहिकेतून गेल्याचे सांगितले.