उरणमध्ये देवीच्या मूर्ती बनविण्याची लगबग
यंदा मूर्तीच्या किमतीत २० ते २५ टक्क्यांनी वाढ
उरण, ता. १८ (वार्ताहर) ः गणपती नंतर वेध लागतात ते नवरात्रोत्सवाचे, या उत्सवाला काही दिवस शिल्लक उरल्याने मूर्तीशाळेत मूर्तिकारांची लगबग दिसून येत आहे.
२२ सप्टेंबर रोजी घरोघरी घटस्थापना होणार असून, नऊ दिवस दुर्गा, कालिका अशा रुपात देवी विराजमान होणार आहेत. यासाठी उरणच्या चिरनेर, कळंबुसरे मूर्तीशाळेत मूर्तिकारांची लगबग सुरू झाल्याचे चित्र पाहायला मिळत आहे. परंतु, मागील वर्षीच्या तुलनेन यंदा देवीच्या मूर्तीच्या किमतीत २० ते २५ टक्क्यांनी वाढ झाल्याचे बळवंत गायकवाड या मूर्तिकारांकडून सांगण्यात आले.
येत्या काही दिवसातच नवरात्रोत्सवाला सुरुवात होणार आहे. शहरातील अनेक भागात मूर्तीना रंग देण्याचे काम सुरू असून, देवीच्या मूर्ती लवकरात लवकर पूर्ण करण्यासाठी कारागीर अधिक मेहनत घेत आहेत. उरण परिसरातील मूर्ती शाळेतील मूर्तिकार दुसऱ्या टप्प्यातील कामात मूर्तीची रंगरंगोटी करण्यात व्यग्र दिसत आहेत. गणेशोत्सवानंतर फार कमी अवधीत देवीच्या मूर्ती घडवायची असते. देवीचे स्त्री रूप असल्याने डोळे, चेहरा, हास्य आदी कामे मूर्तिकारांना बारकाईने करावी लागतात. मात्र यंदा मूर्तीच्या किमतीत २० ते २५ टक्क्यांनी वाढ झाली आहे. मूर्ती तयार करण्यासाठी लागणारे प्लास्टर ऑफ पॅरिस, रंग, नारळाच्या काथ्या, मजुरी आदींमध्ये वाढ झाल्याने यंदा भाव वाढले असल्याचे सांगण्यात येत आहे.
....................
मूर्तींचे काम अंतिम टप्प्यात
घरगुती देवी मूर्ती तयार झाल्या असून, सध्या मोठ्या मूर्तीचे काम अंतिम टप्प्यात आहे. घटस्थापनेसह देवी मूर्तीची स्थापना करण्याची परंपरा असल्याने मूर्तिकारांकडून देवीची मूर्ती साकारण्याचे काम केले जात आहे. साधारण ८ इंचापासून १२ फुटांपर्यंत देवी मूर्ती साकारण्यात येत आहेत. सप्तशृंगी, दुर्गा, रेणुका, महालक्ष्मी, कालिकादेवी, महिषासुरिनी, माँ वैष्णवदेवी, भवानी, एकवीरा माता अशा विविध मूर्ती तयार करण्यात येत आहेत. दुर्गा देवीची सर्वाधिक मागणी असून, त्यापाठोपाठ सप्तशृंगी देवी मूर्तीस जास्त मागणी असल्याचे विक्रेत्यांकडून सांगण्यात आले आहे.