खारघरमधील खेळाच्या मैदानाची दुरवस्‍था
विषारी प्राण्यांचा धोका; पालिकेकडे स्वच्छतेची मागणी
खारघर, ता. १८ (बातमीदार) : खारघर सेक्टर १६ मधील केपीसी शाळेसमोर असलेल्या ५,४७८ चौरस मीटर क्षेत्रफळाच्या खेळाच्या मैदानाची दुरवस्था झाली असून रहिवाशांमध्ये तीव्र नाराजी आहे. मैदानात उभारण्यात आलेल्या जिमच्या साहित्याभोवती पाण्याचे डबके साचले आहेत, तर मैदानात गवत वाढले असल्याने लहान मुलांच्या सुरक्षिततेवर गंभीर प्रश्नचिन्ह निर्माण झाले आहेत.
पालिका प्रशासनाने मैदानाची नियमित स्वच्छता केली नसल्याने हा परिसर पूर्णपणे गवताने व्यापला आहे. खाडी किनाऱ्यालगतचा हा भाग असल्यामुळे येथे साप, विंचू व इतर विषारी प्राणी दिसण्याची शक्यता आहे. त्यामुळे मैदानात खेळणाऱ्या लहान मुलांच्या जीवाला थेट धोका निर्माण झाला आहे. पालकांमध्ये यामुळे भीतीचे वातावरण आहे. नागरिकांनी सांगितले की, या मैदानात परिसरातील रहिवासी व मुले सकाळ-संध्याकाळ व्यायाम, खेळ आणि फिरण्यासाठी येतात. जिमचे साहित्य बसवल्यामुळे या ठिकाणी मोठ्या प्रमाणात व्‍यायामासाठी नागरिकांचा वावर असतो. मात्र, जिमच्या चोहोबाजूला पाणी साचल्याने दुर्गंधी पसरली असून डासांचा प्रादुर्भाव वाढला आहे. रहिवाशांच्या वारंवार तक्रारी असूनही पालिका प्रशासनाने या मैदानाकडे दुर्लक्ष केले आहे, अशी नाराजी व्यक्त केली जात आहे. त्‍यामुळे मैदानातील गवत तातडीने काढून टाकावे, परिसर स्वच्छ करण्यात यावा आणि नियमित देखरेखीसाठी स्वतंत्र व्यवस्था करावी. त्याचबरोबर जिम परिसरातील पाणी उपसा करून तेथे जलनिस्सारणाची सोय केली जावी, अशी मागणी स्‍थानिकांनी केली आहे.