मजुरांच्या मनधरणीची वेळ
ढगाळ वातावरणामुळे भातकापणीला सुरुवात
खोपोली, ता. १६ (बातमीदार)ः पावसाने विश्रांती घेतल्याने जिल्ह्यात भातकापणीची कामे सुरू झाली होती, पण पावसाने पुन्हा हजेरी लावल्याने हाती आलेले पीक वाचवण्यासाठी चिंतित झालेल्या बळीराजावर मजुरांच्या मनधरणीची वेळ आली आहे.
काही दिवसांपासून उष्णतेचे प्रमाण वाढले आहे. भाताच्या लोंब्यांपासून भाताचे दाणे वेगळे होत आहेत. दुसरीकडे बदललेल्या वातावरणाने पावसाची शक्यता निर्माण झाली असल्याने हाती आलेली पीक वाया जाण्याची भीती शेतकऱ्यांना आहे. त्यामुळे नुकसान टाळण्यासाठी आहे त्या स्थितीतील भात कापणीला सुरुवात करण्यात आली आहे. यासाठी परंपरागत शेतीकामे करणाऱ्या मजुरांच्या जमवाजमवी सुरू आहे. परंतु स्थानिक स्तरावर शेतमजुरांची दिवसेंदिवस कमी होत असलेली संख्या तसेच दुर्गम भागातील मजूर दिवाळीच्या काळात गावी जात असल्याने अधिकची मजुरी दिली जात आहे.