वसुबारसनिमित्त गाय-वासराच्या मूर्तींना मागणी
ठाणे, ता. १५ (बातमीदार) : वसुबारस सणासाठी ठाण्यातील बाजारपेठांमध्ये गाय-वासराच्या मूर्ती उपलब्ध झाल्या आहेत. दिवाळीची सुरुवात करणाऱ्या या सणासाठी अनेक जण या मूर्ती खरेदी करीत आहेत. वाढत्या शहरीकरण व डिजिटल युगामुळे सध्या घरीच गाय-वासराच्या मूर्तीची पूजा केली जाते.
प्रकाशाचा आणि उत्साहाचा सण म्हणजे दिवाळी. हा सण मोठ्या उत्साहात देशभरात साजरा केला जातो. शुक्रवार, १७ ऑक्टोबरपासून दिवाळीच्या सणाला सुरुवात होणार आहे. गाय-वासरांची दिवाळी म्हणजे वसुबारसने घरोघरी पहिला दिवा लागणार आहे. पंचांगानुसार आश्विन कृष्ण पक्ष एकादशी म्हणजे रमा एकादशीला वसुबारस आहे. यादिवशी गोवत्स द्वादशी असणार आहे. या दिवशी गाय-वासराची पूजा करण्यात येते.
दरम्यान, ठाण्यातील बाजारपेठेत विविध आकार व प्रकारांच्या गाय-वासराच्या मूर्ती उपलब्ध झाल्या आहेत. मुंबईतील धकाधकीच्या जीवनात व वाढते शहरीकरण, लुप्त झालेले गोठे आणि अन्य कारणांमुळे सध्या वसुबारस घरच्या घरी गाय-वासराच्या मूर्तीची पूजा करून साजरी करण्यात येत आहे.

फायबर मूर्तींना मागणी अधिक
मातीची गाय-वासराच्या मूर्ती १०० तर फायबर मूर्ती ५५० रुपये अशी किंमत असून, गाय-वासरू, गाय-गोपाल, कामधेनु गाय इत्यादी मूर्तींचे प्रकार उपलब्ध आहेत. तसेच फायबर मूर्तींना जास्त मागणी असल्याचे मूर्तिकार प्रवीण पातकर यांनी सांगितले.

पूजनाचा मुहूर्त
द्वादशी तिथीची वेळ १७ ऑक्टोबर रोजी सकाळी सव्वअकरा वाजल्यापासून सुरू होऊन १८ ऑक्टोबर रोजी दुपारी सव्वाबारा वाजेपर्यंत राहणार आहे.