बेकायदा तंबाखूजन्य पदार्थाची वाहतूक उघड
वाडा, ता. २४ (बातमीदार) ः पालघर जिल्ह्याचे पोलिस अधीक्षक यतिश देशमुख यांच्या आदेशानुसार जिल्ह्यातील बेकायदा धंद्यांवर कारवाई सुरू आहे. याचाच भाग म्हणून गुरुवारी (ता. २३) रात्री वाडा पोलिस ठाण्याच्या पथकाने खंडेश्वरी नाका येथे वाहनांच्या तपासणीदरम्‍यान शुक्रवारी (ता. २४) सकाळच्या सुमारास एका संशयित वाहनाची (ट्रक) तपासणी केली असता, त्यामध्ये राज्यातील प्रतिबंधित १८ लाख रुपये किमतीचा तंबाखूजन्य पदार्थ आढळून आला. पोलिसांनी लगेच वाहनचालक मोहम्मद नसिरुद्दीन अन्सारी (वय ३७, रा. झारखंड) याला ताब्यात घेत वाहन आणि तंबाखूजन्य पदार्थ असा एकूण ३३ लाख रुपये किमतीचा मुद्देमाल जप्त करण्यात आला आहे. आरोपीविरुद्ध वाडा पोलिस ठाण्यात गुन्हा दाखल करून त्याला अटक करण्यात आली आहे.
पोलिस अधीक्षक यतिश देशमुख, अपर पोलिस अधीक्षक विनायक नरळे आणि उपविभागीय पोलिस अधिकारी समीर मेहेर यांच्या मार्गदर्शनाखाली पोलिस निरीक्षक दत्तात्रय किंद्रे, पोलिस उपनिरीक्षक मुंढे आणि वाडा पोलिस ठाण्याच्या पथकाने ही यशस्वी कारवाई केली. पोलिस निरीक्षक किंद्रे आणि उपनिरीक्षक मुंढे पुढील तपास करीत आहेत.