बच्चे कंपनीने साकारली राजगडची प्रतिकृती
डोंबिवली, ता. २५ ः दिवाळी सणाच्या उत्साहात बच्चे कंपनी आपल्या परिसरात गड-किल्ले बनवून इतिहासाच्या पाऊलखुणा जपण्याचा प्रयत्न करत असते. डोंबिवलीजवळील सांगाव येथील आशापुरा मंदिर परिसरातील बच्चे कंपनीने यंदा राजगड किल्ल्याची अत्यंत देखणी आणि हुबेहूब प्रतिकृती साकारली आहे.

‘गोल्डन ग्रुप’च्या दहा ते पंधरा वयोगटातील या बच्चे कंपनीने दिवसरात्र मेहनत करून हा किल्ला उभा केला आहे. गौरव शिवगण, श्री कोकाटे, चिन्मय वेतुरकर, वेदिका शिवगण, पार्थ, मयंक, रुद्र, जसवंत या चिमुकल्यांनी हा किल्ला साकारला आहे. विशेष म्हणजे, ही बच्चे कंपनी गेल्या चार वर्षांपासून सातत्याने वेगवेगळे किल्ले बनवत आहे, ज्यामुळे त्यांच्यातील ऐतिहासिक जाणीव आणि एकी दिसून येते.