आजी-नातीचे ७४ हजारांचे मोबाईल लंपास
सकाळ वृत्तसेवा
ठाणे, ता. २५ ः दिवाळीसाठी कोल्हापूर येथून दिव्यात आजी आणि नातीचे मोबाईल फोन लोकलमध्ये चोरीला गेल्याची घटना समोर आली आहे. या घटनेत तब्बल ७४ हजारांचे दोन मोबाईल फोन चोरीला गेल्याचे तक्रारीत नमूद करण्यात आले आहे.
कोल्हापूर येथून गुरुवारी (ता. २३) आजी आणि आईसोबत तक्रारदार ठाण्यातील दिवा येथे येत होत्या. कोयना एक्स्प्रेसने कल्याण येथे त्या उतरल्या व दिव्याला जाणारी लोकल पकडली. लोकल दिवा रेल्वेस्थानकात आल्यावर फोन पर्समध्ये ठेवून गर्दीतून उतरल्या. त्यानंतर पर्समधील फोन पाहिले असता मिळून आले नाहीत. याप्रकरणी ठाणे लोहमार्ग पोलिस ठाण्यात तक्रार दिली असून वरिष्ठ पोलिस निरीक्षक अर्चना दुसाने यांच्या मार्गदर्शनाखाली पुढील तपास करीत आहेत.