मुलुंडमध्ये कुस्ती स्पर्धेला उत्स्फूर्त प्रतिसाद
मुलुंड, ता. २५ ( बातमीदार) ः जय मल्हार कुस्ती महोत्सव मंडळ, जय हनुमान व्यायामशाळा आणि मुलुंड सिटीझन चॅरिटेबल ट्रस्ट यांनी सलग ५६व्या वर्षी भाऊबीजच्या मुहूर्तावर मुलुंड कॉलनीतील गुरू गोविंद सिंह मार्गावरील शिवाजी चौक मैदानावर भव्य कुस्ती स्पर्धा आयोजित केली होती. या स्पर्धेची सुरुवात मुंबईचे माजी महापौर दिवंगत आर. आर. सिंह यांनी केली होती.
स्पर्धेचे उद्‌घाटन मुंबई काँग्रेसचे सरचिटणीस डॉ. राजेंद्र प्रसाद सिंह यांनी केले. केतन शाह (अध्यक्ष-ई. मु. जिल्हा काँग्रेस) प्रमुख पाहुणे म्हणून उपस्थित होते. ज्येष्ठ काँग्रेस नेते बी. के. तिवारी, गोविंद सिंह, राकेश शेट्टी, उत्तम गीते, डॉ. बाबूलाल सिंग, राजेश इंगळे, के. एन. सिंह आदींची उपस्‍थिती होती. विजेत्या कुस्तीगिरांना पाहुण्यांच्या हस्ते पदके, प्रमाणपत्रे आणि बक्षीस रक्कम प्रदान करण्यात आली. महाराष्ट्रातील विविध जिल्ह्यांतील २५ जोड्या कुस्तीत सहभागी झाल्या होत्या. आयोजक राजेंद्र उथवाल, मोहनलाल राज आणि चंद्रभान सिंग यांनी अतुलनीय सहकार्य केले.