भाऊबीजनंतर परतणाऱ्या बहिणीचा अपघातात
सकाळ वृत्तसेवा
ठाणे, ता. २५ : भाऊबीजनिमित्त माहेरी आलेल्या एका शिक्षिकेचा परतीच्या प्रवासात रिक्षामध्ये अपघात झाला. ठाण्यातील वृदांवन सोसायटी येथे राहणाऱ्या शुभांगी भालेराव (वय ३७) या गुरुवारी (ता. २३) मानपाडा येथे माहेरी गेल्या होत्या. मुलांना घेऊन त्या शुक्रवारी (ता. २४) दुपारी साडेतीनच्या सुमारास रिक्षाने घरी परतताना, शंकर मंदिरासमोर भरधाव आलेल्या एका दुचाकीस्वाराने त्यांच्या रिक्षाला पाठीमागून जोरदार धडक दिली. या धडकेमुळे रिक्षातील शुभांगी खाली पडून बेशुद्ध झाल्या. रुग्णालयात डॉक्टरांनी त्यांच्या डोक्याला गंभीर जखम झाली असून, सहा टाके पडल्याचे सांगितले. याप्रकरणी कापूरबावडी पोलिस ठाण्यात शनिवारी (ता. २५) अनोळखी दुचाकीस्वाराविरोधात गुन्हा दाखल करण्यात आला असून, पोलिस पुढील तपास करीत आहेत.