आंबेनळी घाटात कचऱ्याचे ढिगारे
महाबळेश्वर रस्त्याचे भाजीविक्रेत्यांकडून विद्रूपीकरण
पोलादपूर, ता. २६ (बातमीदार)ः पोलादपूर-महाबळेश्वर मार्गावरील आंबेनळी घाट निसर्गाच्या विविध रूपाने नटलेले अभिजात सोंदर्य मानले जाते, मात्र कोकण तसेच घाटमाथ्यावरील भाजीविक्रेत्यांनी फेकलेला भाजीपाला सडल्याने कचराभूमी झाल्याचे चित्र आहे.
आंबेनळी घाटात सडलेला भाजीपाला सातत्याने टाकण्यात येत असल्याने प्रवाशांच्यासह पर्यटकांच्या आरोग्याचा प्रश्न उद्‍भवत आहे. दोन वर्षांपूर्वी असाच प्रकार घडल्यानंतर त्याची दखल घेऊन हरोशी ग्रामपंचायत व वन विभागाच्या कर्मचाऱ्यांना संपूर्ण आंबेनळी घाट स्वच्छ केला. त्यानंतर काही महिने घाटात सडलेला भाजीपाला, कचरा टाकण्याचे बंद झाले होते, पण पहिल्यापेक्षा जास्त कचरा जागोजागी दिसत आहे. वाई भाजी मंडईतून सकाळी मोठ्या प्रमाणात भाजी खरेदी करून व्यापारी दररोज या मार्गावरून जातात. परतीच्या प्रवासात सर्व वाहने मध्यरात्री घाटातून प्रवास करतात. याच गोष्टीचा फायदा घेऊन सडलेला भाजीपाला तसेच गोळा होणारा सर्व कचरा आंबेनळी घाटात टाकतात. रान कडसरी, कापडे खुर्द, देवळे ग्रामपंचायत हद्दीतील दाभिल टोक नजिक पोलादपूर महाबळेश्वर रस्त्यावर आंबेनळी घाटातील प्रत्येक वळणावर हाच प्रकार दिसत आहे.