विरार, ता. २६ (बातमीदार) ः वसईतील नरवीर चिमाजी आप्पा मैदानाच्या दरवाजाजवळील खाऊगल्ली काही वर्षांपूर्वी हटवली होती. ती नंतर मैदानाच्या बाजूला असलेल्या नाल्यावर वसविण्यात आली होती; परंतु पालिकेने गटारावरील स्लॅब कोसळण्याच्या स्थितीत असल्याने फूटपाथवरील खाऊगल्लीवर पालिकेने कारवाई केली होती. आता तेथील फेरीवाले हे मैदानाच्या काही भागात बसविले जाणार असल्याची चर्चा सुरू झाली आहे. त्यामुळे क्रीडाप्रेमी आणि खेळाडूंनी या मैदानात खाऊगल्ली उभारू नये, यासाठी विरोध दर्शविला आहे. अगोदरच शहरात मैदाने कमी असून या मैदानाचा काही भाग व्यापला गेला तर मैदान खेळण्यास अपुरे पडणार आहे. हे मैदान खेळाडूंच्या खेळासाठीच राहिले पाहिजे, यासाठी आम्ही पालिकेला निवेदन सादर केल्याचे क्रीडाप्रेमी सुधीर रेले यांनी सांगितले आहे. याबाबत मैदानात फेरीवाले बसविण्याच्या संदर्भात अजूनही कोणताही निर्णय झाला नसल्याचे महापालिकेच्या अधिकाऱ्यांनी सांगितले आहे.