घाटकोपर, विद्याविहार भागात तीव्र पाणीटंचाई
घाटकोपर, ता. २७ (बातमीदार) ः घाटकोपर पश्चिम तसेच विद्याविहार परिसरातील खलई व्हिलेज, मिलिंदनगर आणि विद्याविहार पश्‍चिम भागात गेल्या तीन वर्षांपासून तीव्र पाणीटंचाई सतावत आहे. पालिकेने या भागात उपाययोजना कराव्यात, अशी मागणी रहिवासी करीत आहेत.
त्रस्त झालेल्या नागरिकांनी अखेर शिवसेना शिंदे गटाकडे धाव घेत आपल्या अडचणी मांडल्या. याबाबत पालिकेकडे पाठपुरावा करून पाणीपुरवठ्याच्या समस्‍येवर ताेडगा काढू, असे आश्‍वासन झोपडपट्टी विभागाचे पदाधिकारी सिद्धार्थ सवने यांनी दिले.
प्रभाग क्रमांक १३० मधील रहिवासी नंदा चौगुले यांनी स्थानिक रहिवाशांच्या वतीने शिवसेना झोपडपट्टी महासंघाचे शाखा अध्यक्ष सैफुद्दीन ऊर्फ शोएब शेख यांची भेट घेतली. तीन वर्षांपूर्वी या भागात पाणीपुरवठा व्यवस्थित होता. मात्र समोरच्या रस्त्याचे काम झाल्यानंतर रस्ता उंच झाल्याने पाण्याच्या लाइनलाही उंच करावे लागले. त्यामुळे आता पाण्याचा दाब कमी झाला असून, सुमारे २० कुटुंबांना पिण्याच्या पाण्यावाचून राहावे लागत आहे. या भागातील माजी नगरसेविका बिंदू त्रिवेदी यांच्या कार्यकाळात नवीन जलवाहिनी जोडणीसाठी अनामत रक्कमही देण्यात आली होती. परंतु तीन वर्षांनंतरही नवीन जलजोडणी झालेली नसल्याची खंत नागरिकांनी व्यक्त केली. त्यामुळे संबंधित रहिवाशांनी महापालिका तसेच पोलिसांकडे लेखी तक्रार दाखल केली आहे, अशी माहिती सवने यांनी दिली.