वज्रेश्वरी, ता. २७ (बातमीदार) : भिवंडी कृषी उत्पन्न बाजार समितीचे माजी सभापती आणि राष्ट्रवादी काँग्रेस पक्ष (शरद पवार गट) ठाणे जिल्हा सरचिटणीस देवीदास पाटील यांची कुणबी समाज सेवा संस्था ठाणे-पालघर जिल्हाध्यक्षपदी बिनविरोध निवड करण्यात आली आहे.
२०१४ मध्ये स्थापन झालेल्या या संस्थेची आजीवन सभासदसंख्या ८०० आहे. समाजातील शैक्षणिक, सामाजिक आणि कृषी क्षेत्रात योगदान देणारी ही संस्था वधू-वर मेळावे, अंधश्रद्धा निर्मूलन मोहिमा, अनिष्ट रूढी-परंपरांच्या विरोधात जनजागृती या माध्यमातून कार्यरत आहे. ठाणे आणि पालघर जिल्ह्यांत संस्थेचे कार्य सातत्याने चालू आहे. पाटील यांनी २०१७ ते २०२२ आणि २०२२ ते २०२५ या दोन कार्यकाळात संस्थेचे खजिनदार व उपाध्यक्ष म्हणून जबाबदारी सांभाळली. त्यांच्या दांडग्या जनसंपर्कामुळे आणि सक्रिय सामाजिक सहभागामुळे त्यांची निवड बिनविरोध करण्यात आली. भिवंडी तालुक्यातील दुगाड हे त्यांचे मूळ गाव आहे. भिवंडी कृषी उत्पन्न बाजार समितीत त्यांनी सलग १५ वर्षे संचालक, उपसभापती आणि सभापती म्हणून कार्य केले आहे. दुगाड ग्रुप सेवा सहकारी सोसायटीचे १८ वर्षे संचालकपद त्यांनी भूषवले आहे. त्यांच्या या अनुभवाचा लाभ संस्थेच्या कार्याला मिळेल, असा विश्वास माजी अध्यक्ष चंद्रकांत लाटे यांनी व्यक्त केला.

नवीन पदाधिकारी जाहीर
निवड प्रक्रियेत उपाध्यक्ष म्हणून शुभाष पाटील आणि विकास जाधव, खजिनदार म्हणून प्रभाकर साबळे, तर सचिव पदावर शामराव कोरडे यांची निवड झाली. ज्येष्ठ संचालक दत्तात्रेय पठारे, काशिनाथ तारमळे, देवानंद पाटील, राजाराम भोईर, शोभना जाधव, अरुणा सांबरे आणि विद्या पाटील यांनी देवीदास पाटील आणि नव्याने निवड झालेल्या पदाधिकाऱ्यांचे अभिनंदन करत पुढील वाटचालीस शुभेच्छा दिल्या.