छट पूजेतून एकतेचा संदेश : डॉ. जे. पी. शुक्ला
कल्याण, ता. २७ (वार्ताहर) : पिसवली येथील श्रीमती जी. आर. सी. हिंदी हायस्कूलच्या प्रांगणात छट महापर्व मोठ्या भक्तिभावाने आणि उत्साहाने साजरा करण्यात आला. या प्रसंगी समाज उद्धार समितीचे सचिव डॉ. जे. पी. शुक्ला यांनी छट महापर्व हा स्वच्छता, पवित्रता आणि एकतेचा संदेश देणारा सण आहे, असे प्रतिपादन केले. कार्यक्रमास संस्थेचे अध्यक्ष बबन चौबे, मुख्याध्यापिका पुष्पा शुक्ला आणि अन्य मान्यवर उपस्थित होते. कार्यक्रमापूर्वी शाळा परिसराची स्वच्छता करण्यात आली होती. संपूर्ण प्रांगण फुले, रंगोली आणि दिव्यांनी सजविण्यात आले होते. छट माईची पूजा अत्यंत श्रद्धेने पार पडली.
डॉ. शुक्ला यांनी सांगितले की, “छट हा निसर्गाशी एकरूप होण्याचा आणि समाजात एकतेचा संदेश देणारा उत्सव आहे.” अध्यक्ष बबन चौबे यांनी सांगितले की, “छट हा भारतीय संस्कृतीचा आत्मा असून पारंपरिक सण समाजाला जोडतात.” मुख्याध्यापिका पुष्पा शुक्ला यांनी सांगितले की, “सूर्य उपासनेद्वारे जीवनात प्रकाश, ऊर्जा आणि सकारात्मकता येते. कार्यक्रमाचा समारोप उगवत्या सूर्याला अर्घ्य देऊन आणि सामूहिक प्रसाद वितरणाने झाला. संपूर्ण परिसर भक्तिभाव आणि एकतेच्या वातावरणाने उजळून निघाला.