भिवंडीत वृद्धेची दगडाने ठेचून हत्या
सामूहिक अत्याचाराचा आरोप

भिवंडी, ता. २८ (वार्ताहर) ः भिवंडी तालुक्यातील चावेभरे या गावांमध्ये शेतावर गेलेल्या एका ६५ वर्षीय वृद्ध महिलेची अत्याचार करून नंतर दगडाने ठेचून हत्या केल्याची घटना मंगळवारी (ता. २८) घडली. गणेशपुरी पोलिसांसह ठाणे ग्रामीणचे अतिरिक्त पोलिस अधीक्षक अभिनव मित्तल, उपविभागीय अधीक्षक राहुल झालटे यांनी घटनास्थळासह रुग्णालयाला भेट दिली असून या शारीरिक अत्याचार व हत्येचा गुन्हा गणेशपुरी पोलिस ठाण्यात नोंद करून गांभीर्याने तपास सुरू केला आहे.
चावे भरे गावातील ही वृद्ध महिला दुपारी बारा वाजता आपल्या शेतावर गेली होती. त्या वेळी तिच्यावर शारीरिक अत्याचार करून दगडाने ठेचून हत्या केल्याचा प्रकार कुटुंबीयांना समजल्यानंतर त्यांनी शेतावर धाव घेतली असता ती निपचित पडलेली होती. कुटुंबीयांनी ही बाब स्थानिक गणेशपुरी पोलिसांना कळविल्यानंतर पोलिस पथक घटनास्थळी दाखल झाले. मृतदेह उत्तरीय तपासणीसाठी स्वर्गीय इंदिरा गांधी स्मृती रुग्णालय या ठिकाणी नेण्यात आला. विशेष म्हणजे, हत्या केल्यानंतर महिलेच्या गळ्यामध्ये असलेले सुमारे पाच ते सहा तोळे वजनाचे सोन्याचे दागिने हे चोरीला गेले नसल्यामुळे ही हत्या चोरीच्या उद्देशाने नसून त्या महिलेवर अत्याचार करून मग हत्या केल्याचा आरोप कुटुंबीयांनी केला. हत्येच्या घटनेनंतर त्या परिसरातून तीन जणांना पलायन करताना काही जणांनी पाहिल्याची माहिती हत्या झालेल्या वृद्ध महिलेच्या मुलाने दिली असून, आरोपींना कठोर शिक्षा करावी, अशी मागणी केली आहे.