भिवंडी, ता. १ (बातमीदार) : अनियमित पावसामुळे गावोगाव आणि शहरांमध्ये आरोग्याच्या नव्या समस्या निर्माण झाल्या आहेत. दमट हवामान, दिवाळीच्या फटाक्यांमुळे प्रदूषणाची पातळी वाढली आहे. त्याचा परिणाम नागरिकांच्या आरोग्यावर होत आहे. ही स्थिती त्रिपुरारी पौर्णिमेपर्यंत कायम राहण्याची शक्यता व्यक्त केली जात आहे.

काही दिवसांपूर्वी दिवसा कडक उन्हाचे, तर संध्याकाळी पावसाचे चक्र सुरू होते. मात्र, अलीकडील दोन-तीन दिवसांपासून सकाळपासूनच आभाळ दाटून येत आहे. अनियमित पाऊस पडत आहे. पाऊस थांबल्यानंतर फटाके फोडल्याने निर्माण झालेले धूर आणि प्रदूषण दमट हवेत स्थिरावले आहे. परिणामी, नागरिकांमध्ये सर्दी, खोकला आणि घशाचे संसर्ग झपाट्याने वाढले आहेत. शहरातील खासगी व शासकीय आरोग्य केंद्रात दररोज सुमारे ७० ते ८० रुग्ण या आजारांवर उपचारासाठी दाखल होत आहेत. बदलत्या हवामानाचा आणि प्रदूषणाचा परिणाम सहजासहजी कमी होत नाही. ॲलर्जी व सायनस असलेल्या रुग्णांना विशेष त्रास जाणवतो. त्यामुळे पुढील काही दिवस सावधगिरी आणि स्वच्छता पाळणे अत्यंत आवश्यक असल्याचे तज्ज्ञांचे मत आहे.

रुग्णांत ३० ते ४० टक्क्यांनी वाढ
गेल्या काही दिवसांत सर्दी आणि खोकल्याच्या रुग्णांमध्ये ३० ते ४० टक्क्यांनी वाढ झाली आहे. ताप, घशाचा संसर्ग, श्वास घेण्यास त्रास अशा रुग्णांची संख्या दिवसेंदिवस वाढत आहे. लहान रुग्णालयांमध्येही परिस्थिती तशीच आहे. ही लाट ग्रामीण भागातही पोहोचली आहे, असे द्रोण डायग्नोस्टिक हॉस्पिटलचे डॉ. सुजित यादव यांनी सांगितले.

आरोग्य तज्ज्ञांचा सल्ला
संसर्गजन्य रोग टाळण्यासाठी भरपूर पाणी आणि द्रवपदार्थ प्या, वाफ घ्या, कोमट पाण्याने गुळण्या करा, धूळ टाळा, मास्क वापरा, हात वारंवार धुवा आणि वैयक्तिक स्वच्छता पाळा. फळे, भाज्या आणि व्हिटॅमिन ‘सी’युक्त आहार घ्या. जर लक्षणे दिसली तर डॉक्टरांचा सल्ला घ्या; स्वतःहून औषधोपचार करू नका, असा सल्ला डॉ. यादव यांनी दिला.