गॅस्ट्रोला ग्रामपंचायत प्रशासनाचे दुर्लक्ष कारणीभूत!
बोरशेतीत आरोग्य विभागाने आधीच दिला होता दूषित पाण्याबाबत इशारा
सकाळ वृत्तसेवा
मोखाडा. ता. १ : मोखाड्याच्या बोरशेती गावात ग्रामपंचायत प्रशासनाच्या दुर्लक्षामुळे गॅस्ट्रोची साथ पसरली असून, ४१ नागरिकांना त्याची लागण झाली आहे. ओहाळातील दूषित पाणी असलेल्या विहिरीचे पाणी प्यायल्याने हा प्रकार घडला आहे. ज्या विहिरीचे पाणी दूषित झाल्याने गॅस्ट्रोची साथ पसरली, त्याबद्दल आरोग्य विभागाने एप्रिल महिन्यातच ग्रामपंचायत प्रशासनाला अहवाल देऊन पाणी दूषित असल्याची माहिती दिली होती. वेळेत विहिरीची दुरुस्ती आणि उपाययोजना न केल्याने हा प्रसंग ओढावला, असा ठपका आरोग्य विभागाने ठेवल्यामुळे ग्रामपंचायत प्रशासन अडचणीत आले आहे.
दूषित पाण्यामुळे गुरुवारी (ता. ३०) रात्री नागरिकांना गॅस्ट्रोची लागण होण्यास सुरुवात झाली, दुसऱ्या दिवशी ही संख्या ४१ वर पोहोचली. यातील तीन रुग्णांवर नाशिकच्या जिल्हा शासकीय रुग्णालयात, तर उर्वरित रुग्णांवर सरकारी आणि खासगी रुग्णालयात उपचार सुरू आहेत. दरम्‍यान, आरोग्य विभागाने नागरिकांना दूषित झालेल्या विहिरीचे पाणी पिण्यास मनाई केली आहे.
------------
- एप्रिल महिन्यात या विहिरीच्या पाण्याचे नमुने घेण्यात आले होते. त्यावेळी येथील पाणी पिण्यास अयोग्य असल्याचे तसेच विहिरीची दुरुस्ती करण्याचा अहवाल ग्रामपंचायत प्रशासनाला दिला होता; मात्र अद्यापही विहिरीची दुरुस्ती करण्यात आलेली नाही.
भाऊसाहेब चत्तर, तालुका वैद्यकीय अधिकारी मोखाडा
------------
यावर्षी वेळेअगोदर पाऊस सुरू झाला आहे. त्यामुळे विहिरीची दुरुस्ती करता आली नाही. त्यातच आता अवकाळी पाऊस सुरू झाला. त्यामुळे विहिरीचे पाणी दूषित झाले आहे
- वैभव एरंडे, ग्रामसेवक, सायदे-बोरशेती