परवानगीशिवाय धार्मिक कार्यक्रम
भिवंडीत ११ जणांविरुद्ध गुन्हा दाखल
भिवंडी, ता. १२ (बातमीदार) : शहरातील कोटरगेट मशिदीजवळ असलेल्या चिंदिशा दर्ग्याजवळ प्रशासकीय आणि पोलिसांच्या पूर्वपरवानगीशिवाय धार्मिक कार्यक्रमाचे आयोजन केल्याप्रकरणी भिवंडी शहर पोलिसांनी सात जणांसह चार अनोळखी व्यक्तींविरुद्ध गुन्हा दाखल केला आहे. या अनधिकृत कार्यक्रमामुळे परिसरात तणाव आणि अशांततेचे वातावरण निर्माण झाले होते.

पोलिसांनी दिलेल्या माहितीनुसार, सद्दाम जमाल अन्सारी, सरवर मोमीन, तोहिद नफीस अन्सारी, गुलाब अन्सारी ऊर्फ ​​सैंदू, शाहिद अन्सारी, उझर मुस्तकीम मोमीन ऊर्फ ​​बन्ने आणि अनीस मोमीन ऊर्फ ​​लंबू यांनी पोलिस परवानगी न घेता ‘दर्गा बाबा उर्स’चे आयोजन केले होते. या कार्यक्रमादरम्यान लाऊडस्पीकरचा वापर करण्यात आला. यामुळे ध्वनिप्रदूषण झाले. स्थानिक पोलिसांची परवानगी न घेतल्याने कार्यक्रमादरम्यान उपस्थित असलेल्यांमध्ये वाद निर्माण झाला. या वादानंतर घटनास्थळी हाणामारी झाली. यामुळे परिसरातील शांतता भंग झाली आणि नागरिकांमध्ये भीतीचे वातावरण निर्माण झाले. याप्रकरणी पोलिस हवालदार नानाभाऊ मधू गोसावी यांच्या तक्रारीवरून सर्व आरोपींविरुद्ध गुन्हा दाखल करण्यात आला आहे. पुढील तपास सहाय्यक पोलिस निरीक्षक शैलेश भोसले हे करीत आहेत.