सारसोळे येथील शाळेच्या मैदानाची दुरवस्था
विद्यार्थ्यांच्या सुरक्षिततेसाठी तातडीने उपाययोजना करण्याची मागणी
नेरूळ, ता. १२ (बातमीदार) ः नेरूळ विभागातील सारसोळे येथील पालिकेच्या ज्ञानज्योती सावित्रीबाई फुले विद्यालयाच्या (शाळा क्रमांक १२) मैदानाची अत्यंत दुरवस्था झाली असून, या मैदानाची तातडीने सुधारणा करून त्यावर लाल माती टाकावी, अशी मागणी ठाकरे गटाच्या युवासेनेचे सारसोळे-कुकशेत विभाग अधिकारी सस्मित भोईर यांनी नवी मुंबई महापालिका आयुक्तांना निवेदनाद्वारे केली आहे.
सारसोळे येथील ही पालिकेची शाळा परिसरात आकर्षक बांधकामासाठी प्रसिद्ध आहे. शाळेचे वर्ग मराठी आणि सीबीएसई या दोन्ही माध्यमांमध्ये भरतात. बालवाडीपासून ते माध्यमिक स्तरापर्यंत शेकडो विद्यार्थी येथे शिक्षण घेतात. तथापि, शाळेसमोरील प्रशांत मैदानाची अवस्था अत्यंत दयनीय झाल्याने विद्यार्थ्यांना शारीरिक शिक्षण, क्रीडा सराव किंवा अन्य शालेय उपक्रमांसाठी खेळताना अडचणी येत आहेत. मैदानावर मोठमोठे खड्डे पडले असून, जमिनीचा पृष्ठभाग असमान झाला आहे. त्यामुळे विद्यार्थ्यांना पडून दुखापत होण्याचा धोका निर्माण झाला आहे. शाळेचे बाह्यरूप आकर्षक असून, इमारतीचा दर्जा उच्च आहे. मैदानाची दुरवस्था मात्र या सौंदर्यावर पाणी फेरते. मैदानाची दुरुस्ती आणि लाल माती टाकल्यास विद्यार्थ्यांना सुरक्षित वातावरणात खेळण्याची संधी मिळेल आणि शाळेची एकूण सुंदरताही टिकून राहील, असे निवेदनात म्‍हटले आहे. शाळा ही केवळ शिक्षणाची जागा नसून विद्यार्थ्यांच्या सर्वांगीण विकासाचे भरवशाचे ठिकाण आहे. खेळाच्या माध्यमातून विद्यार्थ्यांचे आरोग्य, शिस्त आणि आत्मविश्वास वाढतो. दरम्यान, अशा असुरक्षित मैदानामुळे त्यांच्या शारीरिक क्षमतेवर मर्यादा येतात, असे पालकांचेही मत आहे.