समायोजन स्थगिती निर्णयाचे स्वागत
मुलुंड, ता. १ (बातमीदार) ः शालेय शिक्षण विभागाने जारी केलेल्या शिक्षक समायोजनाच्या आदेशाला शालेय शिक्षण आयुक्त सचिंद्र प्रताप सिंग यांनी स्थगिती दिली आहे. आयुक्तांनी दिलेल्या या स्थगितीचे राज्यातील शिक्षक संघटनांनी स्वागत केले आहे. या अनुषंगाने मुंबई शहर शिक्षक विकास मंडळाचे विश्वस्त डॉ. विशाल कडणे यांनी मुख्यमंत्री देवेंद्र फडणवीस, आमदार अमित साटम यांचे आभार मानले आहेत. पुढील काळात ही समायोजन प्रक्रिया पूर्णपणे रद्द होऊन तीन शिक्षक मान्यता व समायोजनाचा प्रश्न कायमचा सुटावा, यासाठी आमचा पाठपुरावा सुरू राहील, असे त्‍यांनी सांगितले.