जिजामाता नगर झोपु प्रकल्पाबाबत विधिमंडळात प्रश्न मांडणार
प्रवीण दरेकर यांचे आश्वासन

मुंबई, ता. ६ : गेली तीस वर्षे विकसकामुळे रखडलेल्या काळाचौकी जिजामातानगर झोपडपट्टी पुनर्वसन प्रकल्पाबाबत नागपूरच्या हिवाळी अधिवेशनात प्रश्न उपस्थित करू, असे आश्वासन आज (ता. ६) महाराष्ट्र गृहनिर्माण स्वयं/समूह पुनर्विकास प्राधिकरणाचे (कॅबिनेट मंत्री दर्जा) अध्यक्ष आ. प्रवीण दरेकर यांनी भेट दिली.
हा प्रकल्प रखडवणाऱ्या विकसकाची नियुक्ती रद्द करून हा प्रकल्प शासनाने ताब्यात घेऊन पूर्ण करावा, यासाठी युवा संघर्ष संघटनेच्या किरण निकम आणि नीलेश गुरव यांसह स्थानिक महिला रहिवाशांनी आमरण उपोषण सुरू केले होते. उपोषणस्थळी आज प्रवीण दरेकर यांनी भेट देऊन रहिवाशांना वरीलप्रमाणे आश्वासन देताना जिजामातानगरवासीयांना न्याय देईन, असेही ठामपणे सांगितले. रहिवाशांनी उपोषण मागे घ्यावे, अशी विनंतीही दरेकर यांनी केली. दरेकर यांच्या विनंतीला मान देऊन युवा संघर्ष संघटनेच्या कार्यकर्त्यांनी उपोषण मागे घेतले. या वेळी स्थानिक आमदार अजय चौधरी, भाजप जिल्हाध्यक्ष शलाका साळवी, नितीन बनकर, गणेश शिंदे आदी उपस्थित होते.