सुहानाचा ‘गोडा मसाला’ विदर्भाच्या बाजारात दाखल
नागपूर, ता. ३१ : विदर्भाच्या अस्सल चवीसाठी प्रसिद्ध असलेल्या ‘सुहाना मसाले’ उद्योग समूहाने खास वैदर्भीय चव असलेला ‘सुहाना अंबारी गोडा मसाला’ विदर्भाच्या बाजारात आणला आहे. ‘सकाळ’ प्रस्तुत ‘सुहाना स्वास्थ्यम्’ उपक्रमांतर्गत आयोजित कार्यक्रमामध्ये नागपूर येथील वनामती सभागृहात केंद्रीय मंत्री नितीन गडकरी यांच्या हस्ते या उत्पादनाचे अनावरण करण्यात आले.
‘सुहाना मसाले’ उद्योग समूहाचे उपाध्यक्ष अमित सूर्यवंशी, ‘सकाळ माध्यम समूहा’च्या नवीन उपक्रम विभागाचे प्रमुख हेमंत वंदेकर, ‘सकाळ’च्या विदर्भ आवृत्तीचे सरव्यवस्थापक बेंजामिन रॉक, निवासी संपादक प्रमोद काळबांडे, सोलापूरचे आमदार व माजी सहकारमंत्री सुभाष देशमुख उपस्थित होते. पदार्थांची चव वृद्धिंगत करण्यात ‘सुहाना’ मसाल्यांचा मोठा वाटा आहे. त्यामुळे महाराष्ट्रातील प्रत्येक स्वयंपाकघरात ‘सुहाना’ मसाला हा असतोच. गृहिणींची पहिली पसंती ‘सुहाना’ला असते. आजवर ‘सुहाना’ने अनेक मसाले बाजारात आणले आहेत; पण सर्वसमावेशक व सर्वच पदार्थांत उपयोगात येणारा विदर्भातील चव असलेला हा ‘गोडा मसाला’ पदार्थांची चव आणखी वृद्धिंगत करणार आहे. गडकरी यांच्या हस्ते या मसाल्याचे अनावरण होताना अस्सल चव कळणाऱ्या माणसाच्या हातून हे अनावरण होत असल्याची भावना सूर्यवंशी यांनी व्यक्त केली. तर, ‘मसाला मी नक्की वापरणार’, असे गडकरी यावेळी म्हणाले. कार्यक्रमाच्या शेवटी रसिक प्रेक्षकांना मसाल्याचे पाकीट भेट म्हणून देण्यात आले.