16309
कोल्हापूर : जिल्हा कौशल्य विकास, रोजगार व उद्योजकता मार्गदर्शन केंद्र, विद्या प्रबोधिनी व ज्योती कॉम्प्युटर सर्व्हिसेस यांच्यातर्फे आयोजित चर्चासत्रात बोलताना राजेश तांबे, व्यासपीठावर धनंजय महाडिक, राहुल चिकोडे आदी.

जेवढे लवकर कमवाल, तेवढी लवकर प्रगती
राजेश तांबे; विद्या प्रबोधिनीमध्ये युवा कौशल्य दिन
कोल्हापूर, ता. १५ : जितक्या लवकर कमवते व्हाल, तितक्या लवकर प्रगती साधाल, असा गुरुमंत्र उद्योजक राजेश तांबे यांनी आज दिला. जिल्हा कौशल्य विकास, रोजगार व उद्योजकता मार्गदर्शन केंद्र कोल्हापूर, विद्या प्रबोधिनी व ज्योती कॉम्प्युटर सर्व्हिसेस कोल्हापूर यांच्यातर्फे आयोजित जागतिक युवा कौशल्य दिन कार्यक्रमात ते बोलत होते.
नोकरीच्या मागे न लागता स्वतःचा उद्योग सुरू करून नोकरी देणारे बना, असा सल्लाही त्यांनी या वेळी दिला. कौशल्य विकास, रोजगार व उद्योजकता मार्गदर्शन केंद्राचे सहायक आयुक्त संजय माळी यांनी कौशल्य विकास विभागातर्फे राबविल्या जाणाऱ्या योजना, कौशल्य विकास प्रशिक्षणाची सध्याची गरज याची माहिती प्रास्ताविकात दिली. विद्या प्रबोधिनीचे अध्यक्ष राहुल चिकोडे यांनी मंत्री चंद्रकांत पाटील यांच्या मार्गदर्शनाखाली सुरू असणाऱ्या या विद्या प्रबोधिनीच्या माध्यमातून विद्यार्थ्यांना रोजगार मिळवून देणे, हे उद्दिष्ट असल्याचे नमूद केले.
खासदार धनंजय महाडिक म्हणाले, ‘‘भारत हा सुरवातीला आयातदार देश होता, तो सध्या निर्यातदार देश बनत चालला आहे. त्यासाठी कौशल्यधारीत मनुष्यबळाची लागणारी गरज लक्षात घेऊन युवक-युवतींनी स्वतःला विकसित करावे. देशाला विश्र्वगुरू बनविण्यासाठी युवकांचे योगदान महत्त्वाचे आहे.’’ कार्यक्रमाला विद्या प्रबोधिनी संस्थेचे सर्व विभागप्रमुख, कर्मचारी, विद्यार्थी उपस्थित होते.