राजेश लाटकर यांची
समजूत काढण्याचे प्रयत्न

कोल्हापूर, ता. ३१ : काँग्रेसकडून उमेदवारी जाहीर झालेले आणि अपक्ष म्हणून उमदेवारी अर्ज दाखल केलेल्या राजेश लाटकर यांची समजूत काढण्यासाठी काँग्रेसकडून प्रयत्न सुरू झाले आहेत लोकसभेसह इतर निवडणुकीमध्ये लाटकर यांनी काँग्रेस उमेदवारांना दिलेले मतांचे पाठबळ लक्षात घेता त्यांची मनधरणी करण्याशिवाय पर्याय नसल्याचे चित्र आहे. दरम्यान, दिवाळीनंतर काँग्रेस पदाधिकारी आणि लाटकर यांची भेट होण्याची शक्यता आहे.
काँग्रेसने उत्तर विधानसभा मतदार संघातून लाटकर यांना जाहीर केलेली उमदेवारी रद्द केल्यामुळे संप्तत कार्यकर्त्यांनी लाटकर यांना अपक्ष उमदेवारी अर्ज दाखल करण्यासाठी पाठबळ दिले. विश्‍वासात न घेता आपली उमदेवारी रद्द केल्याचा रागही लाटकर यांना होता. त्यामुळे शक्तिप्रदर्शन करत त्यांनी उमदेवारी अर्ज दाखल केला. यावेळी काँग्रेसचे नेते आमदार सतेज पाटील, माजी आमदार मालोजीराजे छत्रपती, उमदेवार मधुरिमाराजे छत्रपती यांनी लाटकर यांची समजूत काढणार असल्याचे सांगितले होते. काँग्रेसकडून लाटकर यांच्याशी संपर्क साधला जात आहे. मात्र, लाटकर उमदेवारीवर ठाम असल्याचे सांगितले जात आहे.